Aalisariut Narluneq qaqinneqassaaq, pinngortitamut avatangiisinullu naalakkersuisoqarfik oqarpoq. Aalisariutilli qaqinnissaanut atortorissaarutit amigaataasut KNAPK oqarpoq.Assi: Anguteeraq Høegh Olsen

Kivinikut imaaniiginnartarput: Aalisartut qaqitsinissaminnut atortorissaarutissaqarneq ajorput

Aalisariutit sinerissap qanittuani erniinnartumi kivisimagaangata aalisariutip qaqinneqarnissaanut aalisartut atortussaqarneq ajortut, KNAPK-p oqaatigaa.

Ningittagarsiut Narluneq Iluliaq Seafoodimit piginneqataaffigineqartoq Narsap kitaanni septembarip qiteqqunnerani ikkarlinnermi kingorna kinngusoq piginnittuisa qaqinniartariaqaraat Avatangiisinut Naalakkersuisoqarfimmiit piumaffigineqarput. Angallatillu qaqinniarnerini atortussaqannginnera pissutigalugu piaartumik qaqinniarnerat ajornakusoorsinnaasartoq, KNAPK-mit oqaatigineqarpoq.

Ningittagarsiut Narluneq Narsap kitaani Narlunerup paavata eqqaani Avatarmiuni arfininngornermi septembarip 14-iani ikkarlereerluni kinnguvoq.

Narluneq Danmarkimi amutsivimmukartilluni Narsamiit aallaraluaannarluni ikkarlereerluni kinnguvoq inuttallu tallimaasut ajoqqusinngillat.

Angallatinili Narluneq kisimi taama nalaataqanngilaq

Aalisariutit sinerissap qanittuani kivisimasut qaqinniarneqarnerlu ajortut Kalaallit Nunaani Aalisartut Piniartullu Kattuffiani ilisimaarineqartut, KNAPK-mi siunnersorti Niels Boassen oqarpoq.

- Ajoraluartumik taamak pisoqartillugu angallatinik nuisaanartumi kivisimasunik isumaginnissinnaasut qaqitsiniarsinnaasullu amigaatigineqarput, Niels Boassen oqarpoq.

Ningittagarsiut Narluneq 34 meterinik takissuseqarpoq, meterinillu arfineq-marlunnik silissuseqarluni.

AAMMA ATUARUK Qaqortup eqqaani angallat ikkarlittoq

Angallatillu taamak angissusillit qaqinniarneqassappata qaqitsissutaasinnaasut atortorissaarutillu amigaataasut, KNAPK-oormiut isumaqarput.

Narluneq dieselimik 30.000 literimik, hydralikoliemik 6000 literimik, uuliamillu 300 literimik usisoq Sermitsiaq. AG allaaserisaqarpoq.

Angallatinik kisivisoqarsimatillugu Imaani avatangiisit illersorneqarnissaat pillugu inatsisaat malillugu Narluneq piginnittuisa qaqinniartariaqaraat Avatangiisinut Naalakkersuisoqarfimmit piumaffigineqarput.

AAMMA ATUARUK Aalisariut umiusimasoq suliareqqitassanngortinneqartoq

Angallammi tassaniiginnassappat orsussap avatangiisinut, uumasunut, aalisakkanullu mingutsitsisinnaanera aarleqqutigineqarpoq.

Ningittagarsiut Narluneq Iluliaq Seafoodimiit piginneqataaffigineqarpoq. Suliassartai Sillimmasiisarfimmiit isumagineqalersimasut tassani pigineqataasoq Kim Høegh Dam Qanoruummut ilisimatitsivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat