Kitsissunnguit eqqissisimatinneqalerput

Qeqertat timmiarpassuallit Kitsissunnguit ippassamiit maajip aallaqqaataa 2008-miit eqqissisimatinneqalerput, tamanna Naalakkersuisut akuersissutigeqqammerpaat.
maajip 02-at 2008 05:16

Eqqissisimatitsinissamik suliaqarneq Attaveqarnermut Avatangiisinullu Naalakkersuisoqarfiup, Aasiaat Qasigiannguillu kommuniisa aamma sumiiffiup eqqaani najugallit qeqertanik najuisartuusut akornanni qanimut suleqatigiilluinnarluni ingerlanneqarpoq.

Kitsissunnguit qeqertaapput immikkut illuinnartut, kusanartullu, nalissaqanngitsumik timmiaqarfiusut.

Qeqertaniipput nunarsuaq tamakkerlugu imeqqutaalaqarfiit annersaasa ilaat, imeqqutaallat 18.000-t 20.000-illu akornanniittut piaqqisarfii; immaqa Islandimi imeqqutaalaqarfimmit ataasiinnarmit qaangerneqarsinnaasut.

Imeqqutaallat Kitaata annersaani takussaasartut ukiuni qulikkaani kingullerni ikiliartorsimapput, ullumikkullu qangatuut amerlatigiunnaartut, Namminersornerullutik Oqartussat nalunaarput.

Timmissat allat Kitsissunnguani aamma piaqqisarput. Soorlu Atlantikup avannaani appat assigiinngitsut arfiniliusut ilaat sisamat piaqqisarnerat qeqertat immikkuullarilluinnartuunerannik takussutissaapput.

Naalakkersuisut eqqissisimatitassanngortitsinerminni kissaatigaat pinngortitap pingaaruteqarluinnartuusup piuinnarnissaa mianerinissaalu – aamma kinguaariit tulliuttut eqqarsaatigalugit.

Eqqissisimatitsineq aalajangersakkanik nalinginnaasunik angallannermut, piniarnermut aalisarnermullu tunngasunik malittarisassanik ilaatigut imaqarpoq.

Eqqissisimatitsinermut nalunaarut www.nanoq.gl-imi takuneqarsinnaavoq.

Attaveqarnermut Avatangiisinullu Naalakkersuisoqarfik aamma Kitsissunnguit eqqissisimatitaalernerat pillugu paasissutissiissutissanik suliaqaleruttorpoq, piffissami qanittumi piniarneqarsinnaalertussanik.