Kitaata sineriaanut immap assingi nutaat sananeqalerput
Kalaallit Nunaata Kitaata sineriaani immakkut angalasartut nutaanik ukiut sisamat tulliit immap assiliuunneqassapput.
Immap assingisa nutaanngitsut annertuumik nikingasinnaasarnerat tamatumunnga tunuliaqutaavoq. Sinerissami sumiiffinni amerlanerni sumiiffissiutit ullutsinnut naleqqukkunnaarsimapput.
Danmarkimi Kort- og Matrikel-styrelse aamma Namminersornerullutik Oqartussat taamaammat isumaqatigiissimapput, nutaanik immap assiliortoqassasoq, tamaanilu immakkut angallattut qanoq amerlatiginersut, immallu assingi qanoq nutartertariaqartiginersut paasiniarneqaqqaassaaq.
Immap assingi nutarterneqartussat siulliit Maniitsup Qeqertarsuatsiaallu akornannut tunngasuupput.
Kujataani immap assingi tamatuma kingorna nutarterneqassapput, tassungalu tulliullugu immap assingi Maniitsup Qeqertarsuullu Tunuata akornannut tunngasut nutarterneqassallutik.
Immap assinginit katillugit 93-iusunit 54-it ukiut sisamat qaangiuppata nutarterneqareersimanissaat ilimagineqarpoq.
- Immap assinginik nutaanik takkuttoqangajalernera nuannaarutissaavoq. Kalaallit Nunaata eqqaani imaatigut angallannermi tamanna isumannaannerulersitseqataasussaavoq pingaarutilik, Jørgen Wæver Johansen oqarpoq.
