Kitaata imartaa pisarnermit kissarnerusoq

Nunatta kitaata imartaa pisarnermit suli kissarnerusoq, uuttortaanerit kingulliit takutippaat. Siornamulli naleqqiullugu imartatta kissassusaa appasinnerulaarpoq. Siorna rekordiliisoqarsimagaluarmat.

Danmarkimi silasiorfimmi DMI-mi silasiortut nunatta kitaata imartaani aalisagaqarfinni aasaq manna uuttortaasimapput.

- Nuup avataani Fyllap Ikkannersaanni imaq 1 gradi ataatitsiarlugu kissassuseqartoq uuttortaanermi takuneqarsinnaavoq.

Taanna pisarnermit qaffasinneruvoq, siornamulli naleqqiullugu marloriaataanik tassa appasinnerulluni, immap pissusaanik ilisimatusarsimasoq, DMI-meersoq, Mads Hvid Ribergaard oqarpoq.

Nunap Isuata imartaani sikorsuaqaqqittoq maluginiarneqarpoq, siornatigut taamaattarsimanngikkaluariarluni.

- Immap tarajoqassusia kissassusialu ataatsimut isigissagaanni, takuneqarsinnaavoq Tunumi sarfarissinerulersimasoq, pissuserisimasatoqqaminut uteqqilluni. Sarfap Kalaallit Nunaata kangiatungaaneersup, Irmingerstrøm-ip, kitaata imartaanik suli kissassimaartitsineranut pissutaagunartoq, Mads Hvid Ribergaardip oqaatigaa.