Kitaani tuttut pillugit tusarniaasoqarpoq
Kitaani ukiuni pingasuni tullerni tuttunniarneq pillugu tusarniaaneq aallartippoq. Avatangiisinut Pinngortitamulllu Pisortaqarfiup aamma Aalisarnermut Piniarnermut Nunalerinermullu Pisortaqarfiup ulluni makkunani nassiussuutileruttorpaat tusarniaassutit KNAPK-mut, KANUKOKA-mut, Tapertaralugulu piniarnermik inuussutissarsiuteqartut Kattuffiannut TPAK-mut.
Kitaani tuttutassiissutit qanoq innissaannut atatillugu makku erseqqissaatigineqarput.
Pinngortitaleriffik uumasoqassuseq aallaavigalugu maajip qeqqani siunnersuuteqartarpoq, taava aalisartut piniartullu paasiniaaffigineqartarput. Paasinarsisimavorli Naalakkersuisut ullunik piniarfissanik tuttutassiissutillu qassiunissaannik nalunaarutaat kingusippallaakkut nalunaarutigineqartartoq.
Piniartut, suliffimmik saniatigut piniartartut, piniariartitsisartut, Arctic Green Food allallu piareersarnissaminnut piffissakitsuararsuanngortarput, ukiullu tamaasa Namminersornerullutik Oqartussani,
tusarniaaviusuni aammalu kommunini nukippassuit atorneqartarlutik.
Ivittuut kujammut killeqarfianniit Nuup Kangerluanut tuttut tassaanerusoraat nujuitsut nujoqqassimasut.
Ikiliartorsimaqimmata piffissaq piniarneqartarfiat killilerneqartariaqarsorineqarpoq.
Nuulli akianit Avannaani Naternamut tuttut siornatut amerlassuseqarsorineqarput, taamaattumik Pisortaqarfiit siunnersuutigaat akuersissummik peqarluni tuttunniarneq pisassanik amerlanerpaaffiliiffiunngitsoq ingerlanneqassasoq.
Suli avannarparutta Nuussuarmi Pisortaqarfiit siunnersuutigaat ukiut kingulliit marlut pisarsimanertut akuersissummik peqartunuinnaq tuttut 420-t piniartunut, suliffimmik saniatigut piniartartunut kiisalu akiliisitsillutik piniartitsisartunut pisassiissutigineqassasut. Siunnersuutigineqarpoq pisassiissutit ima agguaanneqassasut: Uummannap Kommunianut 150-it, Ilulissat Kommuniannut 170-it, Qasigiannguit Kommuniannut 50-it kiisalu Qeqertarsuup Kommuniannut 50-it. Kommunit namminneerlutik piniartunut,
suliffimmik saniatigut piniartartunut immaqalu akiliisitsillutik piniartitsisartunut pisassanik agguaassissapput.
Qaanaap kommunia kommunimini tuttunut kisermaassisutuaavoq, taamaammat kommunip nammineq qanoq-iliorneqarnissaat aalajangertussaavaa.
Pisortaqarfiit siunnersuutigaat tusarniaanerup kingorna 2006-7-itut piniarnermut piumasaqaatigineqartut ukiunut 2007/8-mut aamma 2008/9-imullu atuuttussanngortinneqassasut.
Inuussutissarsiutitagalugu aamma tapertaralugu piniartut immikkut immersugassaat, aamma Piniarnermi nalunaarsukkat saniatigut kommunini inuussutissarsiornermut siunnersortit nalunaarutaat innersuussuteqarnermut tunngaviupput. Tusarniaaneq juunip ulluisa 26-anut killeqarpoq.
