Kissaviarsuit ullui ukiunik 2500-nik pisoqaatigisut nassaarivaat
Kissaviarsuit ullui qaqqat itersiumarnganiittut ukiuni kingullerni 2.500-ni kissaviarsunnit ullutut artorneqartarsimasut, ilisimatuup Kurt Burnhamip tuluit nunaanni Oxford-ip universitet-ani sulisup tuluit aviisiannut The Telegraph-imut oqaluttuaraa.
Timmissat ulluanni timmisat anaasa meqquisalu sinnerinik nassaarnermi qulakkeerlugu paasineqarpoq, kissaviarsuit Nunatsinniittut saneqaataasa ukiunik tuusintilikkaanik pisoqaassuseqartut paasineqarmat.
Timmissat ulluinik taamak pisoqaatigisunik nassaarneq, nunarsuarmi siumorneqarsimanngilaq, Kurt Burnhamm oqarpoq.
Silap pissusaata allangoriartornerata kingunerisaanik kissaviarsuit maannakkut manniliorfigisartakkaminnit avannamut nuunnissaat Kurt Burnhamip ernummatigaa, tamatuma kingunerisaanik timmissat piujuarnissaat akornuserneqarsinnaammat, soorlu kiinaaleeraq aamma ulorianartorsiortinneqarsinnaasoq, Kurt Burnham oqarpoq.
Kissaviarsuit ullui nunarsuarmi nutaannginnerpaatut naatsorsuutigineqartut, Nunatsinni sumi nassaarineqarsimanersut, ilisimatuup oqaluttuarerusunngilaa. Timmissat allat soorlu isarukitsut ulluliatik suli ukiuni amerlanerusuni atortarpaat. Sikuijuitsumi kujallermi isarukitsut ullui 44.000-inik pisoqaassuseqartut nassaarineqarnikuusimapput.
