Kissartunik nerisitsinikkut karakterit qaffassaleraat
Qaanaap atuarfiani pisortaq, Jens Gundersen pilersaaruteqarpoq. Atuarfimmi meeqqat atuartut atuarnermik nalaanni kissartunik nerisassaqartinneqalernissaat qulakkeerusukkamiuk.
Siornatigummi pitsaalluinnartumik piffissami sivikitsumi misilittagaqarfineqalersimavoq aningaasaliissutit avataaneersut atorlugit meeqqanut kissartunik nerisitsisarneq.
- Piffissami tassani takuarput nerisaqarneq meeqqat imminnut pissuseqarfiginerannut ataatsimut isigalugu pitsaasumik sunniuteqartoq. Aamma akerleriittarnerit annikilleriarput atuaqatigiinnilu ilinniartitsinermi avatangiisit pitsaanerulerlutillu eqqissisimanarnerulerput, Jens Gundersen oqarpoq.
Taannaannaanngilarli: Nerisaqartinneqarnerup kingunera aamma karakteriini takuneqarsinnaavoq:
- Qularinngilluinnarpara atuariartukulanerulerulernermik kinguneqarumaartoq soorlu aamma atuartut karakteriini tamanna takuneqarsinnaajumaartoq, Jens Gundersen oqarpoq.
Qanormitaavami ullormut ataasiarluni atuartunut 100-nut nerisitsisarnissaq akeqassava? Ukiumut 200.000 koruunit missaanniik akeqarnissaa Jens Geundersen-imit eqqoriarneqarpoq, aammalumi taassuma naqissuserpaa taamaatut aningaasaliinissaq pitsaasuussasoq.
- Aningaasaliinermi anguneqasaaq atuaqatigiiaat ilikkagassaminnut piareersimanerulissasut. Ilinniartitsisut tatineqarnerat minnerulissaaq, sulinertimmi ileqquulersimagaluartutut meeqqat kaattut akornanni aaqqiagiinnginnernut atorunnaassagamikku, atuarfiup pisortaa oqarpoq nangillunilu:
- Meeqqat kaakkunnaarlutik eqqissippata atuaqatigiit eqqissisimanerulissapput, tamatumalu kingunerissavaa ilinniartitaaneq pitsaanerusoq aammalumi ilinniartitsisut tatineqarnerisa minnerulernerata kingunerisussaavaa napparsimasarnerit akuttunerulernerat, Jens Gundersen oqarpoq.
Soorliuku naalakkersuinermik suliaqartut Qaanaami nerisitsisarnissamik misileraasariaqartut? Aap, maanimi meeqqat peqqinnartumik nerisaqarnissamut allamik periarfissaqarpallaanngillat.
- Meerartagummi aningaasaateqaraangamik ajoraluartumik pisiniarfimmukaannartarput kagenik sodavand-inillu pisinarlutik. Isumaqarluinnarpunga peqqinnarnerusunik piserusunnerusaraluartut - assersuutigalugu soorlu iibilinik - tamannali periarfissaajuaannanngilaq.
Taamaattumik Jens Gundersen neriuppoq suliniut naalakkersuinermik suliaqartunit tapersersorneqarumaartoq.
- Qularutiginngilluinnarpara tigussaasumik siunnersuuteqartoqarpat naalakkersuinermik suliaqartortagut tapersersuisinnaassuseqassasut. Tassaavormi maani misilittagarilersimasarput - Qaanaami suliniutitsinnut suliatsinnullu naalakkersuinermik suliaqartuniit ingerlatsivinniillu tapersersorneqarneq, Jens Gundersen oqarpoq.
