Assi: KNR / Foto: Jonas Fievé

Namminiilivinneq: Kissaatigineqarnera Frederiksenip paasisinnaavaa - Løkkellu naalagaaffeqatigiinneq illersorpaa

Kalaallit Nunaat, Savalimmiut Danmarkilu immikkooratik ataatsimoorunik nukittunerusumik inissisimassapput, Lars Løkke Rasmussen (V), naalagaaffeqatigiinnerup ataannarnissaanik kissaateqartoq taama isumaqarpoq. Mette Frederiksenilu (S) paarlattuanik isumaqarpoq namminiilivinnissaq nunatsinnit kissaatigineqanngippat tamanna eqqumiissasoq.

"Illit inuutillutit Kalaallit Nunaata nunatut namminersortunngornissaa neriuutigiviuk?"

Danmarkimi ministeriuninngortussatut sassartut sallersaat marluk, Venstrep siulittaasua Lars Løkke Rasmussen, Socialdemokraatillu siulittaasuat Mette Frederiksen, KNR-imit februaarip naalernerani marsillu qiteqqunnerani apersorneqarnerminni ilaatigut taama aperineqarput.

AAMMA ATUARUK Atlantikup avannaamiut qineqqusaartut tikkuaanissaat pillugu aalassassimaneq Lars Løkkep pisuussutiginerarpaa

Socialdemokraatit siulittaasuat Mette Frederiksen apeqqummut aappimik naaggamilluunniit erseqqissumik akinngilaq.

- Kalaallit Nunaata qanoq iliortariaqarnera uanga isummerfigissanngilara, KNR-imut oqarpoq.

Nunattali nunatut namminersortunngornissaata kissaatigineqarnera paasilluarsinnaanerarpaa.

- Namminiilivikkusuttoqarnera, tamatumunngalu piumassuseqartoqarnera paasilluarsinnaavara. Iluamillu paasinnga: Namminiilivinnissaq kissaatigineqanngippat tamanna eqqumiissaaq.


Socialdemokraatit siulittaasuat, Mette Frederiksen

- Namminiilivikkusuttoqarnera, tamatumunngalu piumassuseqartoqarnera paasilluarsinnaavara. Iluamillu paasinnga: Namminiilivinnissaq kissaatigineqanngippat tamanna eqqumiissaaq, Mette Frederiksen oqarpoq.

- Qanorli iliorluni qaqugulu tamanna pissanersoq oqaloqatigiissutigineqarsinnaavoq. Aamma qaqugu alloriarnissamut piareersimasoqarnersoq kalaallit aalajangigassaraat. Kissaatigineqarnerali paasisinnaalluarpara, Mette Frederiksen apersorneqarnermini taama oqarpoq.

Frederiksen: Naalagaaffeqatigiinneq allanngortinneqarsinnaavoq

Kalaallit Nunaat namminiilivikkusuppat, innuttaasut nammineerlutik tamanna aalajangigassaraat, Socialdemokraatit siulittaasuata erseqqissaatigaa - soorlu aamma tamanna Namminersorneq pillugu inatsimmi aalajangersarneqartoq Folketingimilu amerlanerussuteqartunit arlaleriarlugu taperserneqareersoq.

Tamannali pitinnagu ’naalagaaffeqatigiit’ ilusiligaanerisa allannguiffigineqarnissaa Mette Frederiksenip ammaffiginerarpaa.

AAMMA ATUARUK Kalaallit Nunaat Danmarkimut ataannassaaq

- Naalagaaffeqatigiinneq ineriartorteqqinneqarsinnaanngitsutut isiginngilara. Ukiummi kingulliunerusut kingumut qiviaraanni, imaluunniit ukiut qulikkuutaat kingulliit, taava immitsinnut attaveqarnitta annertuupilussuarmik ineriartorfiusimanera takuneqarsinnaavoq, aamma inatsisip tunngaviusup ataasiusup iluani.

- Naalagaaffeqatigiinneq - uatsinnut nalitsinni inuusunut kingornussatut isigaara – ajunngitsuni ajortunilu. Ataatsimut oqaluttuarisaanerput ilaqarpoq tulluusimaarutigisannik nuannarisannillu. Paarlattuanulli aamma assersuutissaqarluarpoq, Mette Frederiksen assersuutissanik aalajangersimasunik taasaqarani taama oqarpoq.

Løkke: Namminiilivittoqarnissaa neriuutiginngilara

Ministeriuneqarfimmili isuma ullumikkut allaavoq.

Partiit VKLA-t naalakkersuisoqatigiinnissamik toqqammavigisaanni atuarneqarsinnaavoq ’Savalimmiuni Kalaallit Nunaannilu nammineq tunngaviusumik inatsisitaarnissamik kissaateqartoqarnera danskit naalakkersuisuisa ataqqigaat’, ’tamanna naalagaaffeqatigiinnermi killiliussat iluanni pisinnaappat’. ’Savalimmiut Kalaallillu Nunaata naalagaaffittut namminersortunngornissaasa tungaanut.

Tamannali Lars Løkke Rasmussenip suli inuutilluni pissanngitsoq neriuutigalugu erseqqissaatigaa.

- Neriuppunga taama pisoqassanngitsoq. Naalagaaffeqatigiinnermimmi illersuisuuvunga. Danmarkip, Kalaallit Nunaata Savalimmiullu immikkooratik ataatsimoornermikkut nukittunerusunik inissisimanerat upperalugulu illersorpara.

AAMMA ATUARUK Danmark akisussaaffinnut tigusimasatsinnik ikiuutissaaq

Ministeriunerullu tunngavilersuutigaa nunat ukiuni hunnorujulinni ataatsimut oqaluttuarisaanerat, Atlantiku avannarleq ikaarlugu ilaqutariinnikkut atassuteqarluarnerat, soorlu nammineq ilaquttani tamatumunnga assersuutissaalluartut: Lars Løkke Rasmussenimmi nulia, Sólrun Jákupsdóttir, Savalimmiormiuuvoq.

Aamma naalagaaffeqatigiinneq nunat pingasut immikkoornerinit periarfissaqartitsinerusoq, ministeriuneq isumaqarpoq.

Danskillu naalagaaffiata Nuummi Ilulissanilu mittarfiliassanut milliardi sinnerlugu qanittukkut aningaasaliinera tamatumunnga assersuutissaasoq erseqqissaatigaa.

Løkke: Kalaallit Nunaata nammineernerunissaa periarfissaareerpoq

Aningaasaqarnermi minnerunngitsumik pineqarpoq, aammalu Danmarkimit ataatsimoortumik tapiissutaasartut Kalaallit Nunaata isertitaasa affaat sinnerpaat, Danmarkip Kalaallit Nunaanni suliassaqarfinnut akisussaaffigisaminut aningaasartuutai ilanngunnagit.
 
Nunattalu namminiilivissaguna aningaasarsiornikkut imminut napatissinnaanissaa Lars Løkke Rasmussenip aamma apeqqutaatippaa, tamatumalu angunissaata "suli ungasinnera ersarilluinnartoq", ministeriunerup oqaatigaa.

Kingullertullu minnerunngitsumillu, nunatta Namminersorneq pillugu inatsimmi periarfissaasut tamakkeqqajanngilai, nunarpummi naalagaaffiup suliassaqarfiinut 32-nut oqartussaaffimmik tigusinissaminut suli periarfissaqarpoq.

- Suliassat naalagaaffimmit ullumikkut isumagineqartut tiguneqartinnagit tamakkiisumik namminiilivinnissaq oqaluuserissallugu arlaatigut siunertaqarpallaanngilaq.

Ministeriuneq Lars Løkke Rasmussen (V)

- Suliassat naalagaaffimmit ullumikkut isumagineqartut, Kalaallit Nunaannilu politikerinit nammineq akisussaaffigalugit isumagineqarsinnaagaluartut tiguneqartinnagit, tamakkiisumik namminiilivinnissaq oqaluuserissallugu arlaatigut siunertaqarpallaanngilaq, Lars Løkke Rasmussen oqarpoq.

AAMMA ATUARUK Folketingimut ilaasortap Savilimmiuneersup Mette Frederiksen statsministerissatut tapersersorpaa

Namminiilivinneq namminiilivinnginnerluunniit: Qinersinerulli inernera ataqqissallugu Venstrep siulittaasuata  erseqqissaatigaa. Aamma nammineq neriuutigisaminut akerliugaluarpalluunniit.

- Paarlattuanilli kalaallit nammineerlutik siunissaminnik ilusiliinissaat ajoriffissaqartinngilluinnarpara, soorlu aamma Savalimmiut siunissaat savalimmiormiut namminneerlutik ilusilersortussaagaat. Aamma namminiilivinnissamik aalajangertoqassappat tamanna ataqqilluinnassavara. Neriunnermilli ersersitsinngilaq, Lars Løkke Rasmussen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat