Borgmesteri allamut inissiinermik suliat naammagittaalliutaasut tamangajammik kukkuneqarnerannut: Kisitsisit saqqummiussat naammagisimaarpakka

Meeqqat allamut inissitat angajoqqaavisa Kommune Kujalliup suliarinninneranik naammagittaalliutaat arfinillit Isumaginninnermi Naammagittaalliuuteqartarfiup 2022-p aallartinneranili naliliiffigai.
Tamatuma saniatigut naammagittaalliuut alla ataaseq tunuartippaa.
Tamakku paasissutissani pissarsiarisatsinni erserpoq.
Isumaginninnermi Naammagittaalliuuteqartarfiup Kommune Kujalleq naliliiffigisamini arfiniliusuni ataatsimut tunngatillugu isumaqatiginngilluinnarmagu, suliami tassani aalajangiineq allanngortippaa. Sulianimi taakkunannga sisamat kukkuneqaqimmata kommunimut suliareqqitassanngorteqqippai. Isumaginninnermi Naammagittaalliuuteqartarfimmi naapertorlugu suliani sisamani allamut inissiinermut tunngasuusuni aalajangiinerit tunngavilersorneqarnerat naammaginanngillat.
Taamaakkaluartoq Kommune Kujalliup borgmesteriata, Stine Egedep (IA), suliat taakkua allatulaaq isigai.
- Suliavut pillugit naammagittaalliutini katillutik arfineq-marluusuni ataatsimi aalajangiinerup taamaallaat allanngortinneqarnera naammagisimaarpara. Sinnerini aalajangiinerit allanngortinneqanngillat, borgmesteri oqarpoq.
Sulianili sisamat kukkuneqangaatsiarmata kommunimut suliareqqitassanngortinneqarput.
Kommune Kujalleq ataataasunik suliat ilarpaaluini peqataatitsinanilu suliat qanoq aalajangiiffigineqarnerannik ataataasunut ilisimatitsisimanngimmat, Isumaginninnermi Naammagittaalliuuteqartarfiup suliat taakku kukkuneqaqisutut nalilerpai.
Nakuusernermik nalunaarut Kommune Kujalliup allamut inissiinermi suliami tunngavilersuutigisimagini aalajangiinermi itisilersimanngimmagu suliaq taanna naammagittaalliutigineqarpoq. Aamma meeqqanik allamut inissiilertornermi arlalinni tunngavilersuisimanngilaq.
Inatsisitigut pisussaaffiusoq
Naammagittaalliutit amerlassusai Stine Egedep naammagisimaarpai, taakkuami allamut inissiinerit amerlassusaannut naleqqiullugit amerlagisassaanngitsut taanna oqarpoq.
- Isumaginninnermut immikkoortortaqarfipput ilinniarsimasunik sulisussarsiorniapiloornikuunera eqqarsaatigalugu sulisut maannamut naammassisaqarluarsimanerannik nersorpakka. Suliat sisamat tunngavilersorneqarsimannginnerat suliareqqitassanngortinneqarnerannut peqqutaammat kukkuneqartutut isiginngilakka. Taamaammat kisitsisit saqqummiussat naammagisimaarpakka, Stine Egede KNR-imut oqarpoq.
Allamut inissiinermik tunngavilersuisimanissaq inatsisitigut pisussaaffiummat, kommuni inatsisinik unioqqutitsilluinnarpoq. Ilaatigut meeqqat allamut inissinneqarnerisa tunngavilersorneqarnerat angajoqqaavinut takussutissaqarnissaq peqqutaalluni, aalajangiinerit allagaatiginissaat inatsisitigut pisussaaffiuvoq.
Borgmesterip oqaasii Ombudsmandillu 2022-mi ukiumoortumik nalunaarutaalu akerleriilluinnarput. Kommunimmi Isumaginninnermi Naammagittaalliuuteqartarfik suliareqqitassanngortitsereeraangat pisussaaffigigaluarlugu qisuariartanngitsut, Ombudsmandi oqarpoq.
- Uanga paasisara unaavoq Isumaginninnermi Naammagittaalliuuteqartarfiup suliamik suliareqqitassanngortitsilluni utertitsinerata kommunip siusinnerusukkut aalajangiineranik atorunnaarsitsisuunera innuttaasullu taamaalilluni aalajangiivigineqarnissamik utaqqiinnalersimanera kommunit naammattumik eqqumaffiginngikkaat, nalunaarummi allaqqavoq.
Kukkuneqartutut isiginngilakka
Kommune Kujalleq allamut inissiinerit ilarpassuini aalajangiinernik allagaataateqannginnermik taakkunanilu tunngavilersuisimannginnermik aatsaat ajornartorsiuteqalinngilaq.
Kommunit allamut inissiinermik sulianik suliarinninnermik ajornartorsiuteqangaatsiartut, Ombudsmandi 2021-mi ukiumoortumik nalunaarummini ilaatigut allappoq.
- Kommunalbestyrelsini ataasiakkaani politikkikkut akisussaasut ingerlatsiveqarfimminni qanorpiaq ajornartorsiuteqartiginerminnik immaqa naammattumik paasinnissimannginnerannik isuma iperaruminaatsippara, Ombudsmandi taamani nalunaarummini ilaatigut allappoq.
Kommunit tamarmik sulianik taamaattunik suliarinninnermik ajornartorsiortut, Ombudsmandip nunatsinni kommunit borgmesterii tamarmik, aamma Stine Egede, kommunimut 2021-mi qinersinereernermi allaffigai.
Kommune Kujalleq sulisussaalatsisoq qularinngivikkini, Stine Egede oqarpoq. Tassa suliarinnittartut isumaginninnermilu siunnersortitut ilinniarsimasut uani pineqarput.
Suliareqqitassanngortitalli sisamat Isumaginninnermi Naammagittaalliuuteqartarfiup kukkuneqangaatsiarneraraluarai, taakku kukkuneqarujussuanngitsut Stine Egede isumaqarpoq.
- Sulisussaalatsinermi kukkusoqartarpoq. Suliat taakku tunngavilersorneqaqqullugit sulareqqitassanngortinneqarmata kukkuneqartutut isiginngilakka, Stine Egede oqarpoq.
Sualli ilaat naammaginanngitsumik tunngavilersorneqarsimanerat ajuusaarnaraa.
- Erseqqissumik tunngavilersorneqarsimannnginnerat ajuusaarsarnarpoq. Meeqqamut taassumalu angajoqqaavinut ajuusaarnaqaaq. Taama oqartariaqarpunga, borgmesteri oqarpoq.
Isumaginninnermi siunnersortit amerlanerusut pisariaqartinneqartut
Isumaginninnermut ingerlatsivimmi aamma ilungersuasoqarsimasoq, Stine Egede oqarpoq. Isumaginninnermi suliaqartussanik sulisunik isumaginninnermillu siunnersortitut ilinniarsimasunik piffissami sivisuumi amigaateqartoqarsimavoq. Borgmesterilli oqarnera naapertorlugu tamanna 2022-mi ukiakkut qaffasissusaatullu qaffasitsiginngilaq.
- Meeqqat atugarliortut pillugit nalunaarutiginnittoqarpoq. Taamaattoqartillugulu ajornaraluartut erngertumik iluuseqartoqartariaqartarpoq, immaqalu suliamik isumaginninnermi allakkatigut suliassartaani itisiliisoqarpallaarani. Tamanna sanngiiffigingaatsiarsimavarput. Maanna avataaniit sulisussarpassuaqalerpugut, taanna oqarpoq.
Stine Egedep oqarnera naapertorlugu suliamik isumagittut kommunimi suliniut nutaaq aqqutigalugu kukkunitik manna ilinniarfigisinnaalerulissavaat.
Taamaakkaluartorli pinngitsaaliissummik inissiinermi kukkunerit ikinnerulissanersut qulakkeerlugu oqaatigisinnaanngilaa.
- Neriuutigiinnarsinnaavara. Nalunngilara tamarmik sapinngisaminnik suliaqarput. Isumaginninnermik siunnersorti aalajangiinerminik erseqqissumik allagaqarsimanngitsoq sapinngisaminik aamma suliaqarpoq, Stine Egede oqarpoq.
- Inoqarfinni kukkuneqartuaannassaaq.
Kisitsisit uku atuaraanni meeqqat allamut inissinneqarsimasut kukkusumik tunngaveqartumik inissinneqarsimanersoq eqqarsartoqarsinnaavoq. Tamanna pinngitsoortissinnaaviuk?
- Suliat ilisimasaqarfiginngikkukkit oqaaseqarfigisinnaanngilluinnarpakka.
Kisianni ingerlatsiviit tatilluarlugu kukkusumik tunngaveqartumik inissiisoqarsimanngitsoq oqaatigisinnaaviuk?
- Tamanna oqaaseqarfigisinnaanngilara. Sapaatit akunneri sisamat qaangiuppata utertinneqarsinnaasut pillugit oqaaseqarfigisinnaanngilakka. Kisianni ingerlatsiviga sulisullu soorunami tatigaakka, borgmesteri, Stine Egede oqarpoq.