Kisitseqqissaarneq malinnaaffigilluaqaat
USA-mi inatsisartuni sinniisoqarfimmilu ilaasortassanik amerlanerussuteqarluarlutik ippassaq qinersinermi demokratit ajugaallualaavipput. Qinersinerup naammassinerani naalagaaffimmi Virginiami kisitseqissaarneq kikkunnit tamanit qanimut malinnaaffigineqarpoq:
Amerikami tusagassiorfiit tamarmik kina naalagaaffimmi Virginiami inatsisartuni ilaasortanngornersoq avammut saqqummiutissallugu mianersuutigigaat malunnarpoq. TV-eqarfiup CBS-ip tamanna qunuginngilluinnarlugu demokratini ilaasortaq James Webb ajugaasimasoq saqqummiuppaa. Taamaalillutillu demokratit inatsisartuni amerlanerussuteqalerput.
Nutaarsiassaqartitsiviup Associated Pressip Virginiami qinersivinni taasinerit tamaasa paasiniaaffigisinnarlugit naatsuisitsisimavoq – naatsorsuinermilu demokratit ilaasortaat James Webb 7000-inik taaneqarulluni republikanerit inatsisartuni ilaasortaatitaat George Allan ajugaaffigisimagaa paasineqarpoq.
James Webb taassuminngalu tapersersuisut qularunnaavipput:
- Taasinerit tamarmik kisinneqareerput ajugaavugullu, James Webb katerisimaarfimmi nuannattunut taama oqarpoq.
Qinersinermili taasinerit pisortatigoortumik suli nalunaarutigineqanngimmata nutaarsiassaqartitsiviit kikkut ajugaasimanerinik avammut saqqummiussinissartik suli mianersuutigaat. Taamaattorli USA-mi pissutsinik immikkut ilisimasallip Mads Fugledep demokratit qinersinermi ajugaasimanissaat eqqoriarpaa:
- Virginiami qinersisitsinermi atortorissaarutit ajoquteqartut nalunaarutigineqarnikuuvoq. Qanorluunniit kisitseqqissaartoqartigigaluarpat taasinerit nikingassuteqarnissaat ilimaginngilara, Mads Fuglede oqarpoq.
Innuttaasut sinnerlugit sinniisoqarfimmi demokratit amerlanerussuteqalereeramik inatsisartuni amerlanerussuteqalerunik USA-mi pissutsinut sunniuteqarlualernissaat Mads Fugledep aamma ilimagaa.
