Kisimiillutik sassartut tapiiffigineqassanngillat

Kommunalbestyrelsenut aprilip ulluisa arfineq-pingajuanni qinersinissamut kisimiillutik sassartut aningaasanik tapiiffigineqarnissaat qularnarallarpoq. Ukioq manna aningaasanut inatsit naapertorlugu kisimiillutik imaluunniit suleqatigiillutik sassarniartut aningaasaliiffigineqanngillat. Kingullermik kommunalbestyrelsenut qinersisoqarmat kisimiilluni sassartoq 10.000 koruuninik tapiiffigineqarpoq. Namminersornerullutik Oqartussani Kalaallit Nunaanni pissutsinut allaffimmi atorfilik Lars Villadsen oqarpoq demokrati tamakkiisumik atuutissappat ataasiakkaarlutit suleqatigiittullu sassartut tapiiffigineqartariaqartut kikkulluunniit assigiimmik pineqartariaqarmata. Lars Villadsen oqarpoq kisimiittut suleqatigiillutillu sassartut tapiiffigineqarnissaannut tunngasoq massakkorpiaq inatsisilerituunit misissorneqartoq.

Aningaasanut inatsit ukioq mannamut atuuttoq naapertorlugu partit kisimik tapiiffigineqarsinnaapput. Periutsit naliginnaasut naapertorlugit kisimiillutik suleqatigiillutillu sassartut tapiiffigineqarsinnaanngussappata Inatsisartut Aningaasaqarnermut Ataatsimiititaliaa sulipallattariaqassaaq.