Kisimiillutik qinigassanngortittut sassareersimasut aammaarlutik sassaqqipput

Kisimiillutik Inatsisartunut qinigassanngortittut inuit arfiniliupput, ilaat siornatigut iluatsinngitsumik qinigassanngortittareerput, taamaakkaluartoq kingumut sassaqqipput, soormitaavaana sassaqqikkusuttut?

-Isummat annissorniakkakka qineqqusaarnermilu anguniagassattut taakkartorniakkakka, ullumikkut politikkikkut ingerlatsinemi oqallinnermilu sunnguamilluunniit tikinneqarneq ajormata sassaqqinniarpunga, minnerunngitsumik isummanik siammarterinissamut periarfissaq atorluarumallugu Aannguaq Poulsen oqarpoq.

Taanna apereqqipparput, siornatigut qinigaanngitsoortareerluni qineqqusaaqqinnini tamatumuuna ilimagineraa.

- Naamerluinnaq, qinigaanissara naatsorsuutiginngilara aamma tamanna pingaarnerusutut isiginngilara. Isummanilli innuttaasut oqartussaaqataanerata iluani isummersueqataanissara taanna iluatinnartutut isigaara, Aannguaq Poulsen oqarpoq.

Aamma taamatulli ippoq Tasiilameersoq Jens Simonsen, taanna siornatigut Siumut tunuliaqutaralugu sassareerpoq aamma iluatsinngitsumik.

Taanna aperaarput qinigaanissani ilimagineraa.

- Naamik, neriuuteqarpunga soorunami aammalu ilimasunngilanga ukumi unammillertissakka qaffasissumi inissisimammata, Jens Simonsen oqarpoq.

Jens Simonsen aperaarput, sooq ilimasunngereerluni sassaqqikkusussuseqarnersoq.

- Isiginngitsuusaarneq qatsuppara, aamma asuli ingammik utoqqaat inuusuttullumi, soorunalumi aamma sumiginnakkat amerliartornerat isiginngitsuusaaginnarneq sapilerpakka, Jens Simonsen oqarpoq.

Aannguaq Poulsen aamma Jens Simonsen qinigaaqqinngitsuussagaluarunik siunissami aamma sassaqqinnissartik naatsorsuutigaat.