Nunatsinni partiit sinnerlugit qinigassanngortittut 214-t saniatigut inuit arfinillit partiinut pituttorsimanngitsut inatsisartunut qinigassanngortipput.
Qinigassanngortittut arfinillit aqqi nunatsinni pissutsinut allaffeqarfimmi pisortap, Leif Scharling-ip pisortatigoortumik suli saqqummiunnianngikkallarpai, aqaguli saqqummiunneqarnissaat ilimageqquaa.
Qinersinermut inatsit tunngavigalugu partiinut pituttorsimanatik qinigassanngortittut ulluni marlunni periarfissaqartinneqartarput kukkussutaasinnaasunik aaqqiinissaminnut.
- Kisimiillutik qinigassanngortittut tamarmik akuerineqarnissaat qulakkeerluinnarusupparput, tamanullu saqqummiutinnginnerini misissugassat kingulliit misissoqqaartariaqarpagut, Leif Scharling oqarpoq.
Qinigassanngortikkusuttut nalunaarfissaat ippassaq ulloqeqqanut killeqarpoq, killissarititaasorlu qaangiummat partiit ima amerlatigisunik qinigassanngortitaqarput:
Siumut 62-it, Inuit Ataqatigiit 47-it, Atassut 44-it, Demokraatit 45-t kiisalu Kattusseqatigiit Partiiat 16-it.
Kisimiillutik qinigassanngortittut arfinillit ilanngukkaanni novembarip 15-anni inatsisartunut qinersilerutta qinigassarilerpagut katillugit 220-it.