Kim Kielsen: Kisermaassinngilagut - suleqateqarpugut
- Aperisariaqarpunga "Sunaana ajornartorsiutaasoq?". Nammineq taallatsiareerpat: Siumup iluani pissaaneqarusunneq - allamik naamik! Ataatsimeersuarnermi aalajangikkat ataqqinagit ingerlatserusunneq!
Kim Kielsen partiimut malinnaaqqusaanermik amigaateqarneraalluni, Siumut Sisimiuni siulittaasuanut, Kaaleeraq Møller Andersenimut, akissuteqarluni taama allappoq.
Siumut siulittaasua ataqqinninneq aamma amigaataanerarpaa.
- Suleqatigut ataqqissavagut, minnerunngitsumik Naalakkersuisooqatigiit isumaqatigiissutaat najoqqutaralugu ingerlanissarput avaqqussinnaanngilarput.
Siumut Sisimiuni immikkoortortaqarfia Kim Kielsenimik naammaginninnginnini pingasunngormat oqariartuutigaa.
AAMMA ATUARUK Siumumi avissaartuunnermi siulittaasoq isorineqartoq
- Siumumi avissaartuunneq qatsupparput, unittariaqarpoq. Partiimi katersuutsitsisinnaasumik siuttoqartariaqarpugut, Kaaleeraq Møller Andersen taama oqarnikuuvoq.
Kim Kielsenillu Siumumi suli siulittaasuunini immikkoortortaqarfimmut akissuteqarluni erseqqissarpaa, oqaatigalugulu nammineq siuttuunermini angusaqarluartoqarlunilu suleqatigiittoqartoq.
Nunatta aningaasaqarnera siuariarsimasoq, aaqqissuusseqqinnerit pisimasut nunattalu soqutigineqarnerulersimanera tatigineqarnerulersimaneralu Kim Kielsenip Siumumi Naaakkersuisunilu siulittaasuunermini pisimasut naqissuserpai.
AAMMA ATUARUK Vittus Qujaukitsoq Siumut Nuummi siulittaasunngortoq
Taassuma aamma erseqqissaatigaa suleqateqarnermi nammineq piumasat kisiisa aallaavigineqarsinnaanngitsut.
- Kisermaassinngilagut - suleqateqarpugut. Tamanna tulluusimaarutiginiartigu. Minnerunngitsumillu partiit allat mattussimanngimmatigut suleqatigerusulersimallutalu - nuanneq, tulluusimaarnaq, Kim Kielsen allappoq.
AAMMA ATUARUK Siulittaasussarsiornermi oqallineq pisariaqarpoq
Namminiilivinnissamik anguniagaqaqatigiinnissamik kaammattuilluni Kim Kielsen naggasiivoq.
- Allorassaaqataaniaritsi. Anguniagassat annertuut siunniuppagut, peqatiseraatsigit, oqarluartaarneq avissaartuunneq aqqutissaanngilaq - unitsinneqarli!
