KISAQ: Ilisimatusartut inuuniarnerat ajorseriangaatsiarpoq

Kisitsisit 2008-imit juuli 2012 ilanngullugu takutippaat ass. nerisassanut akigitinneqartut 20 procentinik (19,8) qaffariarsimasut. Eqqaaneqassaarlu ineqarnermut akigitinneqartut - tassa najugariniakkami akilerneqartartoq - 30 procentingajannik (27,7) qaffariarujussuarsimasoq. Ilinniarnermut atatillugu najugaqartut tamatuminnga eqqugaangaatsiassapput. Taakkuusinnaasut tassaapput ilinniarnerup aallartinnginnerani ilinniarfiup illoqarfigisaani najugaqartutut allattorneqareersimasut, ilinniarnermut atatillugu najugassaqartinneqanngitsut il.il. Naqissuserneqassaaq kisitsisit sanilliunneqartut tassaammata 2008-imii 2012-imut, ilinniagaqarnersiutilli 4.500 kr.-iusut 2005-imili allanngortinneqarsimanatik.

Najugaqarniarnissaq aamma eqqaaneqarpoq. Ilinniarnermut atatillugu najugaqarsinnaanissamut nalornineq, ingammik Nuummi, ajornartorsiutaasutut eqqaaneqarpoq. Ajortoq ajornerulerniassammat, ilinniarfiit illoqarfiit allameersut Nuummut nuunniarneqarnissaanut pilersaarutit najugaqarniarnissap ajalusoornerunissaanut ernumassut erserpoq.

-Uagut Ilisimatusartut peqatigiiffiani KISAQ-meersuusugut pitsanngorsaaniarnissaq ingerlanniarparput. Ajornartorsiut tamanna piusoq politikkikkut avaqqunniarneqannginnissaa neriuutigaarput, ingammik qanittumi Kalaallit Nunaanniit Danmarkimut ilinniariartunut tapiissutaasimagaluartut peerneqarsimasut. Taakkua aningaasat sipaakkat Kalaallit Nunaanni ilinniartut atugarisaasa pitsanngorsarniarneqarnissaannut atorneqassappat, imaluunniit nunap aningaasarliorneranut matussutissatut atorneqaannassappat?
Danmarkimimi pissutsit pitsaaneruppata, sooq aamma Kalaallit Nunaanni ilinniarusuttoqassava?