- Oqaatigisinnaavara naalakkersuisoqarfinni atorfilittat ulapittupilussuusut, taavalu avammut attaveqarnitsinni miserratiginngilara ilungersunartumik inissisimasoq, kisianni sukataarpugut aaqqinnissaanut, KNR-imut oqarpoq. Assi: Emil Stach / Naalakkersuisut

Kirsten Fenckerip corona pillugu killilersuinerit paasiuminarnerulersinniarniarai

Angajoqqaat arlallit killilersuutit pakatsissutigalugillu paatsuunganartikkaat, Meeqqart Illersuisuata oqaatigaa. Naalakkersuisut killilersuutinik paasiuminarnerulersitsiniarlutik maanna sulissuteqarput.

- Angajoqqaat naalliunnarisimagaat paasisinnaavara, sukataarupparput aaqqinnissaanut avammut attaveqarneruniarluta paasinarsarlugit killilersuutit qanoq isumaqarnersut.

Peqqinnissamut naalakkersuisoq, Kirsten L. Fencker (Naleraq) oqarpoq.

Killilersuutit suut atuunnersut atuutinnginnersulluunniit malinnaaffiginiarnerat ilaatigut ajornakusoorsinnaavoq.

Assersuutigalugu Nuummi Upernavimmilu meeqqat atuarfianni atuartorpassuit tunillatseqqaneranni meeqqanut aqqaneq-marluliineqanngitsunut immikkut ittumik killilersuisoqarpoq.

Meeqqat angajoqqaatit ilagalugit neriniartarfimmukarsinnaanatillu timersortarfimmut assammik arsariarsinnaatitaanngillat.

Meeqqanut killilersuinerit immikkut ittut atuukkunnaareerput. Taamaakkaluartorli piffissaq angajoqqaanut paatsuunganartoq, Meeqqat Illersuisuat oqarpoq.

AAMMA ATUARUK Meeqqat illersuisuata corona malittarisassat paasissutissartaat ersarissut amigaatigigai

- Uani eqqarsaatigivara piffisaq kingulleq maannakkut aamma eqqarsaatigalugu coronamik tunillatsittut akornanni meerarpassuupput taamaalillunilu angajoqqaarpassuit paasissutissanik ersarissunik amigaateqarnera ersarittorujussuanngoqqagami, tassa imaappoq, soorlu paatsiveerusimaarneq ernumanerlu angajoqqaat assigiinngitsunik atuuppoq, pissutigalugu paasissutissat annikinneri taavalu ilaatigut ersarippallaannginneri eqqarsaatigalugu.

Kirsten Fencker: Ulapinnikuuvugut

Ataasinngormat nutaanik killilersuisoqaqqilerpoq. Killilersuinerit aqqaneq-marluleereersimasut assersuutigalugu qanermut assiaquteqarnissaanik piumasaqaatertaqarput.

Peqqinnissamut naalakkersuisup, Kirsten L. Fenckerip killilersuinerit paasiuminarsarneqarnissaat sulissutiginiarlugu nassuiaatigaa, oqaatsillu tamanit paaseqarsinnaasut atorlugit attaveqarniarneq kipiluttunarsimasoq nassuerutigalugu.

AAMMA ATUARUK Corona pillugu maleruagassat Nuummi upernavimmilu atuuttut nunatta sinnerani aamma atuussinnaalersut

- Oqaatigisinnaavara naalakkersuisoqarfinni atorfilittat ulapittupilussuusut, taavalu avammut attaveqarnitsinni miserratiginngilara ilungersunartumik inissisimasoq, kisianni sukataarpugut aaqqinnissaanut, KNR-imut oqarpoq.

Taassuma killilersuutit sorliit kimut atuunnersut nassuiarneqarnissaannut naalakkersuisoqarfimmini corona pillugu killilersuinerit titartagartalerneqarnissaat sulissutigineqartoq nassuiaatigaa.

Killilersuinerit kingulliit qaammatini pingasuni atuuttussanngorlugit marsimi atorunnaartussanngorlugit atuutsilersinneqarput.

Nunatsinni coronavirusi pillugu
killiffik

Tunillatseqqasut ...  
Ullumi tunillatsittut 85  
Siullermik kapitissimasut 73%  
Aappassaa kapitissimasut 68%  
Tunillanneqarsimasut 9.485  
Uninngasut 15  
Anersaartuuteqartitaasut 0  
Toqusut 4  
corona.nun.gl-imi kisitsit takukkit  
   Nutarterneqarpoq: 
Januaarip 22-at 15:00
 

Coronavirusimik tunillatsinissaq pinaveersaaruk