- Suleriusitta taamatut ingerlanera taamanerniilli paatsuunganarsimavoq. Taamaammat massakkut erseqqissaajumalluta nalunaarutaqarpugut, Kirsten L. Fencker (N) oqarpoq.Assi: Emil Stach / Naalakkersuisut

Kirsten Fencker: Upernavimmi suleriuserput paatsuunganarsimavoq

Coronavirusi Upernavimmi qaammat kingulleq tuniluutipiloornera najugaqartunut toqqissisimajunnaarnermik paatsiveerunnermillu kinguneqarpoq. Naalakkersuisut periusissiartik maanna erseqqissaavigalugu saqqummiuppaat.

Upernavimi ukiup affaata ingerlanerani coronavirusi marloriarluni tuniluutipiloorpoq.

Tuniluunneq kingulleq novembarip qaammataani paasineqartoq ima tunillaassuussimatigaaq Upernavimmi najugaqartut  1.100-t affaat tunillatsissimassasut nakorsaanerup nalilerlugu.

- Tuniluunneq ima siammasitsigaaq Kalaallit Nunaanni iliusissiaq ukiuni marlunngulersuni atorneqartoq, tassalu tunillatsissimasunik attaveqarfigisimasaannillu ujartuinermik, angerlarsimanissamillu inassuteqarfiusumik malitaqartoqarsinnaajunnaarluni, Naalakkersuisut tusagassiuutinut taama allapput.

Iliusissiaq taanna Upernavimmi najugaqartunut paatsiveerusimaartitsivoq.Tunillatsiffiup aallaavissiornera akiuussusersuinerillu oqartussanit unitsinneqarput. Upernaviup peqqissaaviani sulisut napparsimasunut ajoqusersimasunullu nukitik atussammatikkit.

- Suleriusitta taamatut ingerlanera taamanerniilli paatsuunganarsimavoq. Taamaammat massakkut erseqqissaajumalluta nalunaarutaqarpugut, peqqinnissamut naalakkersuisoq Kirsten L. Fencker (N) oqarpoq.

Suli misissortittoqarsinnaasoq

Peqqinnissaqarfik tunillatsiffiup aallaavissiornerata unitsinnerani innuttaasunit misissuutinik tigooraajunnaarput. Misissuinerilli unitsinneqarsimanngitsut Kirsten L. Fenckerip nassuiarpaa. Aatsaalli immikkut nalilerneqaqqaarluni tamanna pisarpoq.

- Misissuutinik tigooraaneq ersiutilinnut napparsimasunullu ingerlannikuuarput. Taava massakkut peqqissaavimmiit nalilersuinerit aallaavigalugit sakkortuumik ersiutillit misissortissinnaanerat ersarissarparput. Taannali peqqissaavimmiit nalilersortuarneqarpoq kikkut misissortissinnaassanersut.

Innuttaasut amerlasuut isumaqarput misissuinerit unitsinneqarnikuusut. Tassa imatut paasisariaava misissortinnissamut suli periarfissaqartoq?

- Suu. Taava tassa peqqissaaviup nalilertarpaa kikkut misissortissinnaanersut, Kirsten L. Fencker oqarpoq.

Pisariaqartitsisunut nukiit atorneqassasut

Upernavimmi suliniutinik allanik aallartitsisoqarnikuuvoq. Tunillatsissimasinnaasunik ujartuineq novembari naalersoq unitsinneqarpoq peqqinnissaqarfiup sulisuisa pisariaqartitsisunut nukii atorneqarniassammata. Tassalu coronavirusimik tunillanneqarsimasut napparsimaruluttut katsorsarneqarnissamut pisariaqartitsisut sukkanerpaamik ikiorneqarsinnaanissaat qulakkeerniarneqarpoq.

Napparsimasut katsorsarneqarnissamut pisariaqartitsisut coronavirusimik tunillanneqarsimanersut misissuiffigeqqissaarnissaat qulakkeerniarlugu misissuutinik naammattunik peqarnissaq aamma qulakkeerneqarpoq. Taamaasilluni napparsimasoq COVID-19-imik tunillatsissimanersoq paasiaaneqarsinnaanngorlugu.

Nappaatinik allanik ajoqusernernillu katsorsaanissap sulisutigut qulakkeerneqarniarpoq. Soorlu kræfti peqqutigalugit napparsimarujussualersinnaanerup misissuiffigineqarnissaanut periarfissaqaqqullugu.

Nunaqarfinni innuttaasut akornanni nappaalasoqalissagaluarpat nunaqarfinni peqqinnissaqarfinni sulisut suleqatigalugit siusinaartumik iliuuseqartoqarnissaa qulakkeerneqassaaq. Tuniluuttoqartoq pasitsaanneqarpat sapinngisamik misissuinermik aallartitsisoqassaaq, tamatuma kingorna tunillatsissimasut mattunneqassallutik akiuussutissinneqanngitsut qanigisaat angerlarsimatinneqassallutik.

Upernavimmi coronavirusimut akiuussutissamik maanna kapitittoqarsinnaanngilaq.

Akiuussusersuinerit 2022-p aallartinnerani aallarteqqinneqassapput, pingajussaannik kapitinnissaq 18-inik ukiulinniit utoqqaanerusunut neqeroorutigineqassasoq naalakkersuisut ilanngullugu paasissutissiissutigaat.

Nunatsinni coronavirusi pillugu
killiffik

Tunillatseqqasut ...  
Ullumi tunillatsittut 85  
Siullermik kapitissimasut 73%  
Aappassaa kapitissimasut 68%  
Tunillanneqarsimasut 9.485  
Uninngasut 15  
Anersaartuuteqartitaasut 0  
Toqusut 4  
corona.nun.gl-imi kisitsit takukkit  
   Nutarterneqarpoq: 
Januaarip 22-at 15:00
 

Coronavirusimik tunillatsinissaq pinaveersaaruk