Kirkegaardip naalagaaffiit aallartitaat ataatsimeeqatigigai
Aatsitassanut radioaktivenik qinngornilinnut nutaamik politikkeqalerneq oqaluttuarineqarpoq. Naalakkersuisut aatsitassanut qinngornilinnik attuilluinnanngeqqusinerup atorunnaarsinneqarnissaanut Inatsisartut ukiaanerani ataatsimiinnissaannut tunngaviusumik aalajangertoqarnissaanut siunnersuuteqartussaapput.
Aammattaaq aatsitassarsiornermi suliniutit akileraarusersuiffigineqarneranni akileraarutit qaffanngikkaluarlugit akileraaruseeriaatsip allatut ilusilersorneqarnissaa paasissutissiissutigineqarpoq. Kiisalu aamma Kalaallit Nunaata kangiata avannaani uuliasiorfissat arlalinnut suliariumannittussarsiuunneqarnerat pillugu paasissutissiisoqarpoq.
- Nunarsuarmi inuiaqatigiinnut Kalaallit Nunaanni aatsitassanut politikki patajaatsoq unammilleqatigiissutaalluarsinnaasorlu attatiinnarneqartoq pillugu saqqummiussinissamut periarfissinneqarnera pitsaalluinnarpoq. Ukiunilu aggersuni aatsitassarsiornermi suliniutissanut uuliasiorlunilu misissuisoqarnissaanut isumalluarpunga”, Inuussutissarsiornermut, Aatsitassanut Suliffeqarnermullu Naalakkersuisoq Jens-Erik Kirkegaard naalagaaffiit aallartitaat Danmarkimiittut naapeqatiginerisa kingorna oqarpoq.
Jens Erik Kirkegaard Nunat Avannarliit Siunnersuisoqatigiivisa suliffeqarneq pillugu ataatsimiinneranni aqagu peqataassaaq, suliffissaaleqinerlu pingaarnertut tassani sammineqartussaavoq