Kirkegaardip ICC WWF-ilu isumaqatiginngilluinnarpai
Suliniutit angisuut oqartussanit aalajangiiffigineqartussanngorneranni, inuiaqatigiit akuutinneqanngippallaartarneri nalunaarusiami isornartorsiorneqarpoq.
ICC-p aamma WWF-ip nalunaarusiaat, Jens Erik Kirkegaardip aviisimut Politikenimut allaaseraa, nalunaarusiaq tusagassiorneq malillugu asuli oqalunnermik tunngaveqartoq; oqaatigalugulu inuiaqatigiit suliniutinut akuutinneqarneri siammasinnermik paasisariaqarmat.
- Aatsitassarsiornermik suliaqartut innuttaasunik paasisitsiniaaneri inuiaqatigiinnik akuutitsisartutut uanga paasisarpara, pingaartumik aatsitassarsiorniarnermut attuumassuteqartut kikkut taamaasa ilanngullugit suliffeqarfissuit nalunaarusiortartillugit, Jens Erik Kirkegaard naqissusiivoq.
Aatsitassarsiorniartoqartillugu suliffeqarfissuarnut piumasaqaataasartoq, tassalu inuiaqatigiinnut qanoq sunniutaasinnaaneri, VSB-mik taaneqartartoq, tamassumunnga attuumassuteqartut tamarmik naliliisinneqartarneri suliffeqarfissuit nalunaarusiaanni ilanngunneqartut oqarluni taama allaaserisaqarnerminut tunngavilersuutigaa.
- Tamassumunnga ilanngullugu oqaatigissavara, paasissutissat tamarluinnarmik tamassumunnga tunngasut, Aatsitassanut Aqutsisoqarfiup nittartagaani kikkunnilluunniit atuarneqarsinnaammata. Jens Erik Kirkegaard allappoq nangillunilu allalluni, kikkut tamarmik soqutiginnikkunik inuiaqatigiit akuutinneqarnissaat pillugu tigussaasunik siunnersuuteqarsinnaasut oqalliseqataasinnaasullu, aamma ICC WWF-ilu.
- Tunngaviatigut uggoraara, Nunatsinni pingaaruteqarluartumik suliniuteqartoq ICC, saqqummiussinerminni pissutsit ajornartorsiutaasinnaasut kisiisa saqqummiuttarmatigit, ineriartortitsinermi iluatsilluartut saqqummiunnagit, Jens Erik Kirkegaard aviisimi Politikenimi allaaserisaqarpoq.