Kirkegaard: Suliniutit angisuut pillugit inatsit isumaqatigiissutinik kalluaanngilaq
Aatsitassanut naalakkersuisoq Jens Erik Kirkegaard, Sara Olsvigip (IA) § 37 naapertorlugu apeqquteqaataanut akissuteqarpoq. Sara Olsvigip paaserusuppaa suliniutit angisuut pillugit inatsit ILO-mut isumaqatigiissutinut nr. 87, 94, 98, 111 aamma 169-imut kalluaaneranik Naalakkersuisut qanoq isumaqarnersut. Kirkegaardip taamaattoqannginnerarpaa.
Allattoq Peter Troelsen, Simon Uldum
apriilip 30-at 2013 11:33
Danskit suliassaqartitsinermut ministeriaqarfiata ukiormanna januaarimi allakkiaa innersuussutigaa. Tassani suliniutit angisuut pillugit inatsit Kalaallit Nunaatalu nunani tamalaani isumaqatigiissutaasunut tunngatillugu pisussaaffii nalilersorneqarsimapput.
Allakkiami allaqqavoq Suliassaqartitsinermut ministeriaqarfiup ILO-mi isumaqatigiissutit attuumassutillit misissornerisigut Suliniutinut angisuunut inatsisip Kalaallit Nunaata ILO-mut pisussaatitaaffiinut akerliunngitsut ministeriaqarfiup tamakkiisumik naliliinerigaa inerniliissutigalugulu. Kirkegaard nalunaarpoq, Naalakkersuisut Suliassaqartitsinermut ministeriaqarfiup naliliinera Naalakkersuisut tusaatissatut tigusimagaat.
