Kirkegaard: Paatsoorluni taputartuussisoqarpoq

Aatsitassanut naalakkersuisoq Jens Erik Kirkegaard isumaqarpoq urani pillugu nalunaarusiaq saqqummiunneqaqqammersoq uranimut akuersaanngilluinnarnerup atorunnaarsinneqarnissaa pillugu Inatsisartut oqallinnissaannut kinguartinneqartumut paatsoorluni taputartuunneqartoq.
oktobarip 08-at 2013 08:14

Taakku marluk imminnut atassuteqanngillat. Nalunaarusiaq aalajangiiffigisassatut siunnersuummut attuumassuteqanngilaq, aamma akuersaanngilluinnarneq pillugu oqallinnissamut nalunaarusiap atuaqqaarsimanissaa pisariaqanngilaq, Jens Erik Kirkegaard isumaqarpoq.

-Aalajangernissamut siunnersuut nalunaarusiamik tunngaveqanngimmat. Naalakkersuisut aalajangernissamut siunnersuutaat ukiuni arlaqalersuni urani pillugu oqallinnernik, nalunaarusianik aamma misissuinernik ukiuni kingullerni ingerlanneqarsimasunik tunngaveqarpoq, aatsitassanut naalakkersuisoq nassuiaavoq.

2008-miilli innuttaasunik ataatsimiisitsisoqartarpoq, aamma nalunaarusiat arlallit saqqummersinneqarsimapput, taakkulu siunnersuummut Inatsisartuni oqallisigineqartussamut toqqammavissatut atorneqarput. Taamaammat IA-p nalunaarusiap saqqummersinneqaqqammersup atuarnissaanut piareersarnissamut piffissakippallaarnermik isornartorsiuinerat, Jens Erik Kirkegaard naapertorlugu, eqqunngilaq.

-Nalunaarusiaq una pingaaruteqarpoq, taamaallaalli tunngaviusumik isummernerup kingorna siunissamut suleriaqqinnissamut isigisuuvoq, Kirkegaard oqarpoq.