Kirkegaard: Akileraaruseriaasissaq piffissaagallartillugu isumatusaarnissamik aallaaveqarpoq
Naalakkersuisuusimasup Maliina Abelsenip Siumup susassaqarfimmut politikkianik isornartorsiuinera Kirkegaardip taamaatut qisuariarfigaa. Maliina Abelsen Nunatsinni Danmarkimilu tusagassiutini oqaatigisimavaa, Naalakkersuisut aatsitassarsiornermut tunngatillugu akileraartarneq pillugu nalorninermik allaallumi uivernermik pilersitsisimasut.
Jens Erik Kirkegaard naapertorlugu, ilaatigut royaltynik akiliisitsisarnissamik ilaqartussamik akileraaruseriaasissamut ilusiliamik Naalakkersuisut maanna suliaqarput.
- Ingerlatseqatigiiffiit unammillersinnaassusiata Namminersorlutik Oqartussallu isertitassaasa qulakkeerneqarnissaat, taamatut ilusiliamik suliaqarnermi aallaavigineqassapput. Ilusiliaq taanna qanoq piviusunngortinneqarsinnaanersoq pillugu ingerlatseqatigiiffinnik oqaloqatiginninnerit pitsaasumik maanna ingerlanneqarput, Kirkegaard tusagassiorfinnut nalunaaruteqarluni taama allappoq.
Peqatigitillugu naqissuserpaa taamatut ilusiliamik suliaqarneq piffissaagallartillugu isumatusaarnissamik aallaaveqartoq, aammalu ukiorpassuarni ileqorineqarsimasumik nangitsinerusoq, tassalu aatsitassanut politikki 2004-mit ukiut tallimakkuutaarlugit nutarteriffigineqartarluni. Tamannalu pissutigalugu 2014-imi nutarterisoqarnissaa pissusissamisoortutut aamma isumaqarfigaa.
Aatsitassat pillugit politikkimik nutarterinerit allat assingalugit, politikkikkut akuersissutigineqarnissaa, Inatsisartuni nalinginnaasumik amerlanerussuteqarluartunit akuerineqartartoq, sioqqullugu annertuumik piareersaateqarfigineqassaaq.
Jens Erik Kirkegaardillu aamma oqaatigaa, ammasumik akimullu ersittumik periaaseqarneq matumani aamma atorneqassasoq.
Siunnersuutip saqqummiunneqannginnerani, Inatsisartuni, tusagassiutini, innuttaasut soqutigisaqaqatigiiffiillu akornanni sukumiisumik oqallisigineqaqqaassaaq, Inuussutissarsiornermut Aatsitassanullu naalakkersuisoq Maliina Abelsenimut akissuteqaammini taama allappoq.
