Kirkeby-p eqqumiitsuliai Aasianni

Aasiaat nunarsuarmi kisiartaalluni Per Kirkeby-p eqqumiitsuliaanik 22-nik pigisaqarpoq. Eqqumiitsulialli sillimmaserneqanngillat tuniniarneqarsinnaanngitsutut tunissutaammata. Qalipagarpassuit sillimmaserneqarsinnaanngikkaluartut takornarianut soqutiginaatilittut tuniniarneqalerput.

Suulut Sandgreen, ulluinnarni Aasiaat katersortarfianni nakkutilliisuusup katersortarfiup saniatigut nunarsuatsinni eqqumiitsuliortut tusaamasaanerpaat ilaata suliaannik nakkutilliisuuvoq. Tassalu Per Kirkeby-p suliaanik.

Illu nalinginnaq sillimmasigaagami Per Kirkebyp immikkut eqqumiitsuliai 22-it sillimmaserneqarnikuunngillat.

Eqqumiitsulialliukua 1969-mi Naalagaaffiup eqqumiitsuliornermut aningaasaateqarfianiit tunissutaasimasut. Taamanikkut Aasianni Kæmneriusup aningaasaateqarfik eqqumiitsulianik tunissuteqaqqullugu qinnuteqarfigisimagamiuk.

Taamanikkut katersortarfiit qanoq isaasoqartiginera aallaavigalugu aningaasalersorneqartarallarmata.

Naalagaaffiullu aningaasaateqarfiata taamanikkut eqqumiitsuliortoq tusaamaneqanngitsoq neriunarluartorli Per Kirkeby Aasiaat Katersortarfiannut qalipaatikkiartorsimavaa. Kirkeby 1966-mi Den eksperimenterende Kunstskolemi naammassisimagami.

Per Kirkeby ujarassiuutut ilinniarsimasuugami sineriapput tamakkingajallugu angalasimavoq, suliamilu pingaarnerit ilaasa nunatsinniinnerat nuannaarutiginerarpaa.