Per Kirkeby immikkut saqqummersitsissaaq

Per Kirkeby aamma Kalaallit Nunaat. Sapusiap tasinngortitap isertugaatai, taama immikkut saqqummersitsineq taaguuteqartoq katersugaasivimmi Ordrupgaardimi, Charlottenlundimiittumi februaarip 25 –ani ammarneqassaaq.
Allattoq Ludvig Siegstad
februaarip 15-at 2012 10:22

Saqqummersitsinermi sapusiap tasinngortap isertugaataani takuneqarsinnaassapput Kirkebyp immikkuullaarissumik eqqumiitsulioriaatsini takutillugulusooq Kalaallit Nunaata pinngortitaanik titartarsimasai qalipassimasaalu, katersugaasiviup Ordrupgaardimiittup Kirkebyp immikkut saqqummersitsinissaanik ilisarititsilluni ilaatigut allappoq. Saqqummersitsineq februaarip 25-anit septembarip 2-anut pissaaq.

- Kirkebyp eqqumiitsuliai nunani tamalaani tusaamasarsuupput, Kalaallit Nunaat pillugu eqqumiitsuliortarnini tusaamasaassutigilerlugu. Kalaallit Nunaat eqqumiitsuliortarnermigut takorloorlugu uteqqiaffigisuaannarpaa, eqqumiitsuliortutullu suliaasa pitsaanerpaartaat Kalaallit Nunaannut tunngasuullutik, ujarassiuup eqqumiitsuliortullu immikkut saqqummersitsinissaa pillugu, Kirkebymik immikkut ilisimasalik Erik Steffensen oqarpoq.

Per Kirkeby Kalaallit Nunaannut tunngasumik ukiut 50-it sinnerlugit eqqummiitsuliortarpoq.