Kirgistanimi nakkutilliineq angoqqilerpaat
Kirgistanimi peqqinnissamut ministerip oqarnera naapertorlugu inuit toqutaasimasut ullaaq manna 68-iupput, aporaattoqarujussuarneranilu 527-t ikiligaasimapput, nutaarsiassaqartitsivimmi AFP-imi tamanna allaaserineqarpoq.
Kirgistanimi illuatungiliuttut ilisimatitsissutigaat, ministeriuneq, Danijar Usenov, tunuarniuteqarsimasoq, "inuiaallu naalakkersuisui" maanna pilersinneqarsimasut.
- Pisunik nakkutilliisussanik naalakkersuisunngortitsivugut, illuatungiliuttut siulittaasuat, Rosa Otunbajeva, nutaarsiassaqartitsivimjmut Ritzauimut oqarpoq.
Ministeriuneq tunuarmat illuatungiliuttut siulittaasuat arnaq taanna naalakkersuisunut maanna siulittaasuugallarpoq, ullumikkullu neriorsuutigaa, nunami tamangajammi nakkutilliineq iluatsikkiartortoq.
Rosa Otunbajeva illersornissamut ministerinngorallartumik suleqateqarpoq, illersornissamullu ministeriugallartoq taanna aamma oqarpoq, sakkutuut sakkulersorsimasut killeqarfinnilu nakkutilliisut naalakkersuisuugallartunit nakkutigineqartut.
- Sakkutuut pissaanerat naalagaaffiup iluani pissutsinut politikkimut assortuunnermi atoqqinneqanngisaannassaaq, illersornissamut ministeriugallartoq oqarpoq.
Nutaarsiassaqartitsivimmi AP-imi allaaserisat naapertorlugit Kirgistanip illoqarfiisa pingaarnersaanni Bishkekimi ullumikkut eqqissisimapput.