Kirgisistanimiorpassuit toqutaapput

Præsidenti Kirgisistanip kujataani eqqissiviilliornerit aallartimmatali tamaanga aatsaat ullumi takuniaavoq. Maannamut toqutaasut quleriaammik amerlanerunissaat ilimagineqarpoq.

Manna tikillugu toqutaasut 200-sut Kirgisistanimi oqartussaasunit oqaluuserineqarput, toqutaasulli quleriaammik amerlassuseqassagunartut, præsidenti eqqissiviilliortoqareersorlu siullermeerluni nunap ilaanut tamaanga takuniaasoq oqarpoq. Rosa Otunbajeva Osjimut timmsartumik ullumi nunnimmat sakkutuut aalassassimaarput, tassami nunap ilaa tamanna suli ulorianartorsiorfiummat.

Uzbekerit nunanit allanit kingoqqisut Kirgiserillu sapaatip-akunnerani kingullermili aporaattalerput. Tamaani inuit ajornartooqqapput pissutsillu najummassimanarlutik, præsidentillu ullumi tamakkua aaqqinniaraluarlugit. Russisut oqalulluni oqarpoq illoqarfiup Osjip eqqissiviilliornernit eqqugaanerpaajusup sanaqqinneqarnissaa siunertaasoq.

- Qimaasut utertinniarnissaannut atugassarititat pitsaanerusut pilersittariaqarpavut. Isumaqarpunga Kirgiserit Uzbekerillu eqqissillutik inooqatigiinnissamut piumassuseqartut, Otunbajeva oqarpoq. Taava tuluttut oqalulerpoq nunarsuarmioqatigiillu aporaannernik ingasaassisumik pissanganarsaarinnginnissaat kajummissaarutigalugu.

- Maannakkut suleqatigiippugut, suleqatigiittugut amerlaqaagut. Naalakkersuisulli Uzbekerini allanit kingoqqisut akornanni pissutsinik nakkutilliinngimmata tatigineqanngillat.

Qimaasoq illoqarfimmit Osjimeersoq uteqqissamaanngilaq:

- Meeqqat toqorarpaat niviarsiaqqallu aqqaneq-marlunnik 13-inilluunniit ukiullit pinngitsaalillugit arneriffigalugit. Uternissarput iluaqutaanngilaq, maaniissaanga, meeqqakka illoqarfimmi tassaniitikkusunngilakka, taanna taama oqarpoq.