Kinnock kumattut kukerujussuit marluk akornaniittutut misigivoq
Kinnock Skt. Petersborgimi British Councilimi pisortatut atorfeqartoq ippassaq unnukkut russinit tigusarineqarmat paasisat siulliit naapertorlugit imigassartorsimalluni biilersimammat tigusarineqarsimasoq oqaatigineqaraluarpoq, tamannali Helle Thorning-Schmidtip eqqunnginnerarpaa.
Helle Thorning-Schmidti oqarpoq pisimasoq uinilu misigissutsikkut attorneqaatigisimagitsik, Thorning-Schmidtillu nammineq oqaasii issuarlugit; uini kumattut kukerujussuit akornanniitsutut misigisimasoq.
Tusagassiortup Jacob Illeborgip Tuluit Nunaanniit nalunaarutigaa, naalagaaffiit aallartitaasa 2006-imili novembarip qaammataani aalassassimaarutigiligaannik aallaaveqartoq. Taamani russit kilitsissiarisimasaata, Alexander Libvenjenkop Londonimi toqunartumik toqunneqarnerata kingorna russit kilitsissiaat alla, Andrej Ljukeboj tuluit Ruslandimiit Tuluit Nunaannut tunniunneqarnissaa piumasarigaluarpaat, taamanikkulli tassa nunat taakku marluk naalagaaffimmik aallartitaat nunaminniit aniseqattaalerpaat. Russit allaat British Council, kulturikkut aallartitaqarfiinnaagaluartoq matoqqullugu arlaleriarlutik piumasaqartaraluarput, tuluilli manna tikillugu matuseqqusineq akuerisarsimangilaat. Taamanili pisunit aallaavillit ulluni makkunani pisut, tuluit aviisiisa unnukkut saqqummertartut saqqaanni allaaserineqarput. Tuluit nunanut allanut ministeriat nalunaarpoq russit kamaateqalugit pakateqalunilu. Naalagaaffiit aallartitaasa isumaqatigiinnginnerisa sakkortusiartuinnarneranut takussutissaavoq russit Tuluit Nunaanni aallartitaqarfianni pisortaasup maannakut qaaqquneqarsimanera tuluillu ministeriunerata qisuariarnissaa aamma utaqqineqaannarpoq, Jacob Illeborg Londonimiit taamatut nalunaarpoq.
