Kiniserip akiligaanik Qeqqatami takornariat GPS-eqartalissasut
Qeqqata Kommuniata aningaasanut ataatsimiititaliaata marlunngornermi ataatsimiinnermini tamanna aalajangiuppaa.
Kangerlussuarmiit Sisimiunut pisoqataatilluni inuusuttoq kinamiu 27-nik ukiulik siorna juulimi tammarpoq.
Taamaammat Partii Naleraq sinnerlugu kommunalbestyrelsimut ilaasortap Malene Ingemannip aaqqissuussisoqarnissaa siunnersuutigaa, takornariat soorlu Arctic Circle Trailimi peqataasut qularnaveeqqusiilaarlutik inunnik sumiissusersiummik GPS-imilluunniit atortulerneqartalernissaat.
AAMMA ATUARUK Takornariat sumiissusersiuuteqarsinnaalissasut
Takornariap tammartup ilaqutaasa pisullutik takornariartunut isumannaallisaanerup pitsanngorsarneqarnissaanut koruuninik 100.000-nik aningaasaliipput.
Aaqqiissuteqartoqarnissaa siunertaralugu kommunip suleqatigiissitaliaa siunnersuuteqarpoq aningaasaliissuteqarusuttut aningaasaliissutaannik 40-nik GPS-isisoqarnissaa qarasaasiallu aqqutigalugit inniminniisimasunut attartortitsisoqartassasoq.
Taamaalillutik illoqarfimmiut takornarialluunniit akiliillutik GPS-inik inniminneerisinnaalissapput; akiliutit allaffissornermut atortunullu nutaanut atorneqartassapput.
AAMMA ATUARUK Søskende har ikke opgivet håbet
Arctic Circle Businessimi suleqatigiissitap neriuutigaa takornariat taamaalillutik pitsaaanerusumik isumannaallisarneqassasut, ujaasinernullu aningaasartuutit akisoqisut ikilisarneqarlutik.
Kommunip takornarianut pisuttunullu GPS-inik attartortitsisalernissaanut tammartoqarnerani pisup alianartup qaangiunneranit ukioq ataaseq sinnerlugu qaangiuttorlu maanna kommunalbestyrelsip akuersissuteqarnera amigaataaginnalerpoq.
Taama aaqqissuussineq inatsisitigut piumasaqaataanani illoqarfimmiunut takornarianullu neqeroorutaaginnarallassaaq, inatsisiliuunniaraannimi ukiunik arlalinnik sivisussuteqarsinnaavoq.