Kinguppanniarnermik aaqqissusseqqinnissamut nalunaarusiaq

Nunatsinni kinguppattassiisarnerup maannamut ingerlanneqarnera uparuagassartaqarujussuanngilaq. Taamaattorli kinguppattassiisarnermik kinguppanniarnermillu aaqqissuusseqqinnissamut periarfissat arlaqarput, nalunaarusiaq Namminersornerullutik Oqartussat suliarititaat ullumi saqqummiunneqartoq taama oqariartuuteqarpoq.

Kinguppattassiisarneq maannamut ingerlalluarmat annikitsuinnarmik aaqqiissuteqartoqarsinnaasoq, nunatsinni aalisarnermut attuumassuteqanngitsut nalunaarusiortut ataatsimiititaliaat naliliivoq. Aalisartut isertitaannut annikillisaataanngitsumik nunatsinni kinguppanniartut amerlineqarsinnaanersut Ataatsimiititaliap misissorsimavaa. Ataatsimiititalimi suleqataasoq, Syddansk Universitetimi aningaasarsiornermut ilisimatooq Niels Vestergaard ima naliliivoq:

- Annertunngitsumik aaqqiissuteqartoqarsinnaanera tikkuarparput, soorlu pisassiissutinik nakkutilliinermut akiliuteqartitsisalernikkut annaasassat matussuserneqarsinnaapput, taamaalillunilu tulaassisussaatitaaneq atorunnaarsinneqarsinnaavoq, tamannalu Namminersornerullutik Oqartussanit tassa aalajangerneqartussaavoq, Niels Vestergaard erseqqissaavoq.

Aalisarnermut naalakkersuisup Finn Karlsen-ip nalunaarusiaq iluarisimaarpaa:

-Nalunaarusiaq imartoorujussuuvoq, kisianilu politikikkut massakkorpiaq oqaaseqarfigiuminaalluni, apeqqutinik annertoorujussuarnik pilersitsimmat, isumasioqatigiissutigeqattaartariaqagassanik.

Finn Karlsen oqarpoq ukiuni arlalinngortuni oqilliserusaaginnarneq tamaannga killeqartariaqalersoq.

- Suleqatigiissitap suliaa tunngavigalugu nalilersueqqissaartariaqassaagut siunissami raajarniarnerup qanoq isikkoqarnissaa eqqarsaatigalugu.

Finn Karlsen oqarpoq nalilersuineq Aalisarnermut Pisortaqarfimmit aallartinneqassasoq.

- Aalisarnermi susassaqartut soqutigisaqaqatigiiffiit kattuffiillu peqatigalugit suliarineqassaaq, naggataagullu Naalakkersuisut Inatsisartunut inassuteqartussaassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat