PTSD-mik nappaateqartut katsorsarneqartalernissaat meeqqat illersuisuata kissaatigaa.Assi: KNR

Kingunerlutsitserujussuartarnerit katsorsarneqartalernissaat ujartoraa

Meeqqat PTSD-mit tarnimikkut nanertuuteqartut nunatsinni misissuiffigineqarneq ajorput. Meeqqallu arlaqartut taamatut tarnimikkut nanertuuteqartut katsorsaneqarneq ajornerat Meeqqat illersuisuata allangortikkusuppaa.

Sakkortuunik misigisaqarsimallutik kingunerlutitsisartut tarnimikkut nanertuuteqalersarput, sakkutuullu sakkortuunik misigisaqarsimasut kingunerlutitsisarnerat amerlasuunit ilisimaneqarpoq. 

Kingunerlutitsineq pisarpoq sakkortuunik misigisaqarsimatiluni eqqarsaatitsigut takkuaannartarnerat oqimangiutigineqartarlutillu. 

Meeqqat sakkortuunik misigisaqarsimatillutik kingunerlutitsisinnaasarput taannalu qallunaatut naalisarlugu taaguuteqartinneqarpoq PTSD ( Posttraumatisk Lidelse ) Kalaallit Nunaannilu meeqqat nanertuuteqarsimallutik kingunerlutitsisarnerat  misissuiffigineqarnikuunngilaq. 

Meeqqat kingunerlutitsinerisa misissuiffigineqarnissaat Meeqqat illuisuisuata kissaatigaa. 

 - PTSD-imik nappaateqartut amerlassusiat ilisimaneqanngimmat, aamma kingunerlutitsinermik PTSD-mik nappaateqartut eqqortumik ikiorserneqarnissaanut sakkussat Kalaallit Nunaanni suli  amigaataammata,  Aviaaja Egede Lynge oqarpoq.

Meeqqap eqqortumik katsorsarneqarnissani pisinnaanngikkuniuk alliartornermini kingunerlutsitsisinnaavoq.

Syddansk Universitetimi nalunaarusiap 2012-imeersup takutippaa kalaallit meerartaasa 30 procentii inuunerminni imaannaanngitsunik aqqusaagaqarsimasut kingunerlutitsinermik nanertuuteqarput.  

Meeqqat Illersuisuat isumaqarpoq, meeqqat taamatut nanertuuteqarnersut paasiniarlugit oqaloqatiginerisigut naliliinerit meeqqat katsorsarneqarnissaannut atatillugu iluaqutaajumaartut.   

- Nalunngilara inuusuttorpassuit meerarpassuillu inuunerminni sakkortuumik nalaataqartut inuunermi sinnerani  kingunerluuteqarlutik inuusinnaagamik, allaat ilikkartaasiannut ineriartornissaannullu innarliisinnaallutik, Lynge oqarpoq nangillunilu, - taamaattumik PSTD-mik nappaateqartunut misissuisinnaanissaq eqqortumillu ikiorsiinissaq anguniarlugu  pingaaruteqarluinnarpoq tamassuma nunaatsinni eqqumaffigilernissaa, Aviaaja Egede Lynge taama oqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat