Kinguartitsinissamut isumaqataanngilaq

Imaatigut angallassinerup ukiortaamit allanngortiteriffigineqarnissaa siusippallaartoq Atuisartut Siunnersuisoqatigiit isumaqarput, piareersarluarnissarlu eqqarsaatigalugu kinguartitsisoqartariaqaraluartoq naalakkersuisunut kaammattuutigaat. Tamatumunngali Naalakkersuisut siulittaasuat Hans Enoksen isumaqataanngilaq.

- Pipallatamik aalajangiisoqanngilaq, Inatsisartut tunngaviusumik sipaarniaqqusaat malillugit Naalakkersuisuni aalajangerpugut. Piumasaat soorunami malittussaagatsigit aamma inuiaqatigiinnut ilaatigut nuannerpallaanngikkaluartut malitassavut malittariaqaratsigit aalajangiineq ingerlapparput, ilimaginngilaralu annertunerusumik allanngortinneqarnissaa. Hans Enoksen nassuiaavoq.

Atuisartunut Siunnersuisoqatigiit aamma isumaqarput, imaatigut angallannermi aappaagumit akit qulakkeerneqarsimanngimmata aaqqissuussinermut nutaamut ikaarsaarnissami atuisunut akornusiisoqannginnissaa pillugu kinguartitsisoqartariaqaraluartoq. Susassaqartulli tamarmik aalajangernermik apuussiffigineqareermata piffissaliineq naammareertoq Hans Enoksen isumaqarpoq:

- Siusissumi tamatta ilisimareerparput, kinguartitsisoqassappallu isumaqatigiinniarnerit nutaamik aallartinneqartariaqassapput. Minnerunngitsumillu aningaasarpassuit million koruunit arlallit ujarneqartariaqassapput. Naalakkersuisut siulittaasuat erseqqissaavoq.

Aamma oqarpoq, Naalakkersuisuni aningaasanik taama amerlatigisunik atugassanik ukiumut tulliuttumut nuussisinnaanatik, taamaattoqassappallu Inatsisartut aatsaat aalajangeereerpata suleriaqqissinnaassallutik.

- Ukiuni arlalinngortuni namminersortunngorsaanerit uagulli sioqqulluta ingerlanneqareerlutik pilersaarutigineqareerlutillu naammassiaartuaarneqarnerat isumaqarpunga alloriarnerusoq, siunissamimi nunatsinni tapiissutaannavinnik ingerlalluta napatinniarsinnaanngilavut. Ineriartorusuttut allat noqiinnarsinnaajunnaarpavut, peqataasariaqarpugut sapiisernissatsinnut.

Hans Enoksenip tamanut kaammattuutigaa, Arctic Umiaq Line ukiortaamit ingerlaannassanersoq pillugu aggustip naajartulernerani aalajangernissaq utaqqimaaqqaariarlugu oqallinnerit erseqqinnerusut ingerlateqqullugit taamanikkussamut pissutsit erseqqinnerulersimassammata.

Kommuneqarfiit kattuffiat KANUKOKA juulimi aamma nalunaaruteqarpoq, piareersarluarnissaq eqqarsaatigalugu sivisuumik ikaarsaariarfissiisoqartariaqaraluartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat