Kinguartitsinissamik piumasaqaat Hans Enoksenip itigartippaa
Kommunit iluarsaateqqinneqarnissaata assortuussutaasup kinguartinneqarnissaannik Kanukokamut aallartitat Sisimiuni ataatsimiinneranni piumasarineqartoq, naalakkersuisut siulittaasuata Hans Enoksenip itigartippaa
- Januaarip aallaqqaataa 2009 aalajangersimavoq, Hans Enoksen oqarpoq, taamaalillunilu iluarsaaqqinnissap kinguartinneqarsinnaanera siullermeerluni kommuninut itigartitsissutigaa. Ukiumik ataatsimik kinguartitsisoqarnissaa kommunini politikerit taannariuarsimagaluarpaat. Sermitsiap internetikkut nittartagaani tamanna atuarneqarsinnaavoq.
Kalaallit Nunaata namminiileriartornermut atatillugu suliassanik arlalinnik qallunaat naalagaaffianniit ungasinngitsukkut tigusisussaanera Hans Enoksenip aalajangernerminut peqqutaanerarpaa. Tamatumalu kingunerisaanik suliassat nutaamik agguaqatigiinneqartariaqarput:
Namminersornerullutik Oqartussat suliassanik arlalinnik qallunaat naalagaaffianniit tiguseriarpata kommunit namminersornerullutik oqartussat suliaannik arlaqarnerusunik tigusissapput, Hans Enoksen oqarpoq.
Kommunit maannakkut 18-iusut iluarsaaqqinnermi kommunerujussuarnut sisamanut kattussornissaat aalajangersimavoq. Tamatumali saniatigut aamma suliassat assigiinngitsut arlallit inissinneqartussaapput. Sermitsiaq taama allappoq.
