Kinguaassiuutsitsigut atornerluisartut pineqaatissinneqartarneri sakkortusinikuupput

Pinerluttulerinermi inatsit aallaavigalugu pineqaatissiisoqartarpoq, pinerluuteqarsimasullu atugarisaai isiginiarpallaarnagit maanna pinerluutigineqarsimasoq aallaaviginerullugu pineqaatissiisoqartalernikuulluni.

-Kinguaassiuutitigut atornerluisartut pineqaatissiisarneq qangaanerusumut naleqqiullugu sakkortuserujussuuvoq. Pineqaatissiinissap aaliangerneqarniarnerani taanna unnerluutigineqartoq qanoq annertugisumik qanorlu sivisutigisumik pinerluuteqarsimasoq isiginiarneqartarpoq.

Eqqartuussutit aalingerniarneranni innuttaasut sinnerlugit eqqartuusseqataasut marluk peqataasarput, taakku kommunalbestyrelsenit ukiuni sisamani atasussatut toqqarneqartarput.

Eqqartuusseqataasullu inatsisilerituujunngikkaluarlutik pineqaatissiinermut sunneeqataasarput.

- Taakkualu tassa inuiaqatigiinnut sinniisutut taaneqarsinnaapput, taamaattumillu eqqartuussutip imaluunniit pineqaatissiissutissap aaliangerniarnerani annertuumik sunneeqataasinnaallutik, Jens Møller oqarpoq.

Pinerluuteqarsimasup pineqaatissinniarneqarnerani inuttut atugarisai isiginiarneqarpallaaratik, maanna pinerluutigisimasaata suunera aallaavigalugu pineqaatissiisoqartarpoq, tamannalu pineqaatissiisarnerit sakkortusinerinut ilaavoq.

Meeqqanik kinguaassiuutsitsigut atornerluisartut pineqaatissinneqartarnerini, inuiaqatigiit tungaaniit oqariartortoqartarporlusooq "pineqaatisinneqarnera sivikik"

- Paasinarluarpoq taamatut qisuariaateqartoqartassappat, kisianni aamma aappaatigut uani apeqqutaanginnarpoq, aviisiliortup tusagassiinermini unnerluutigineqaataasoq eqqortumik tusagassiuutitigut tusagassiuutigineraa, imaluunniit ukua qulequttat atuinnarlugit tusagassiisimanersoq, taamaattumik pingaaruteqarluinnartuuvoq, tusagassiortup eqqortumik tusagassiinissaa, Jens Møller, Eqqartuussisut peqatigiiffianni siulittaasoq oqarpoq.

Sapaatip akunnerata siuliani angut 66-nik ukiulik meeqqanik kinguaassiuutitsigut atornerluisimasutut qaammatini arfineq pingasuni pinerlussisunut inissiisarfimmiittussanngorlugu pineqaatissinneqarpoq.

Pineqaatissiinerlu innuttaasunit sivikigineqarluni qisuariarfigineqaqattaarpoq.