Kinguaassiuutitigut kannguttaatsuliorfigineqarsimaneragaaneq politiit ammaqqikkumanngilaat

Inatsisartuni siulittaasuusimasup, Jonathan Motzfeldtip, taavalu Inerisaavimmi pisortap, Jens Jakobsenip, Inatsisartut Allattoqarfianni arnamut sulisumut kinguaassiuutitigut siorna kanngutsaatsuliorsimanerat pillugu, Jonathan Motzfeldtip angerlarsimaffiani pisimasumut atatillugu, suliap suliareqqilernissaanut tunngavissaqarani Kalaallit Nunaanni Politimestereqarfik isumaqarpoq.
apriilip 14-at 2009 17:58

Sulisup, Anja Hynne Nielsenip, Danmarkimi maanna najugaqartup, immiussissuteeraq nassarlugu poorskimi saqqummiuppaa, tassanilu Jonathan Motzfeldt taamani pisimasumi iliuuserisimasani ajuusaarutigai, ilaatigut oqarluni: ”Nuanniilliortissimagukkit ajuusaarutigisorujussuuara” ilaatigullu taamani pisimasoq ”unnuk eqqarsarluarfiunngitsutut” taagorlugu.

Politiinulli paasissutissat, immiussaq ilanngullugu, nutaarsiassaanngitsut politiit illersuisuat, Søren Martin Jensen, Radioaviisimut oqarpoq.

Angutit pineqartut marluk unnerluussaanngillat, taamani paasiniaanermi kinaassusersiortoqarani, uppernarsaatissanilluunniit tigussaasunik nassaartoqarani.