Kinguaassiuutitigut innarlerneqartut nalunaarutiginissaat nalornissutigineqartarpoq
Tamanna Meeqqat Inuunerissut aamma Innuttaasut peqqissusaannik Naalagaaffiup misissuisarfiata misissuitsineranni paasineqarpoq.
- Meeqqanik kinguaassiuutitigut innarlerneqarsimasunik ilisimannittut nalunaaruteqarnerminni, imminerminnut ilaquttaminnullu sunniussinnaanera nalusarpaat aamma nalusarpaat aterminnik taasinngikkaluarlutik nalunaarsinnaatitaanerminnik pisinnaatitaaffeqarlutik, Meeqqat Inuunerissut siulersuisuini ilaasortaq, Britta Nielsen Johansen oqarpoq.
Misissuisitsineq Meeqqat Inuunerissunit suliakkiunneqarpoq - Innuttaasut peqqissusaannik Naalagaaffiup misissuisarfik sinnerlugu, Cecilie Petrine Pedersen missisuitsinermik suliaqartuulluni.
Misissuisitsineq 2011-mit 2012-mut suliarineqarpoq, nunarput tamakkerlugu apeqqutinik akisassanik immersuinikkut aamma oqarasuaatikkut apersuinermi, kiisalu pisortani sulisut taakkununnga ilaallutik meeqqanik sullissisut. Inuit katillutik 699-it akissuteqaataat aallavigineqarput.
Meeqqat kinguaassisiuutitigut innarliisarnerup ammasumik oqaluuserineqarnissaa tunuarsimaarfigineqartartoq misissuisitsinermi paasineqarpoq, apersorneqartummi 40 procentiisa ammasumik oqaluuserineq ajormassuk.
- Malunnarpoq kinguaassiuutitigut innarliisarnerup ammasumik oqaluuserineqarnissaa nangiarineqartoq, taamaattumik paquminarunnaarnissaa pillugu Meeqqat Inuunerissumip sinerissami illoqarfinni nunaqarfinnilu suliniuteqarnerani ilanngunneqassaaq, aamma sammisassaqartitsisoqassalluni, Britta Nielsen Johansen oqarpoq.
Meeqqat kinguaassiuutitigut innarlerneqartut pisortanut nalunaarutigineqarnissaannut kinaluunnit pisussaaffeqarpoq tamannalu pillugu Meeqqat Inuunerissut sinerissami pikkorissartitsisarpoq taannali naammanngitsoq misissuisitsinermi paasineqarpoq.
- Nalunaarsinnaatitaaneq pillugu pikkorissartitsinerit ataavartumillu annerusumillu saqqummersinneqartuaannarnissaa Meeqqat Inuunerissumip suliniarnerani tullinnguuppoq, Britta Nielsen Johansen oqarpoq.
Inuttussuseq sanilliukkaanni nunatsinni meeqqat kinguaassiuutitigut innarlerneqartartut nunanut avannarlerni amerlanerpaajuaannarput.
Misissuitsinermi akissuteqartut 699-iusut taakkunani niviarsiaqqat 34 procentii kinguaassiuutitigut innarlerneqarsimapput nukappiaqqat 15 procentii innarlerneqarsimallutik. Kisitsit ukiuni kingullerni allangorpiarsimanngitsut Meeqqat Inuunerissunit oqaatigineqarpoq.
Misissuitsinermi paasisat atorlugit nalunaartussaatitaanermut periarfissat Meeqqat Inuunerissut paasisitsiniaaneranut atorneqassapput.
