Kinguaassiuutitigut atornerluisimasutut pasineqartoq

Aasianni meeqqat kinguaassiuutitigut atornerlunneqarsimasut pillugit suliaq ingerlaleruttorpoq.
Allattoq Jaaku Lyberth
februaarip 19-at 2008 05:29

Angut 51-inik ukiulik Aasianneersoq meeqqanik inuusuttunillu – nukappiaraanerusunik kinguaassiuutitigut atornerluisimasutut pasineqartoq, siorna decemberimi tigusarineqarpoq. Taama AG ullumi saqqummersumi allaaserisaqarpoq.

Aasianni politiit meeqqanik inuusuttunillu taamatullu atornerlugaasimasunik ilisimasaqartunik 26-nik amerlassuseqartunik killisiuileruttorput.

Nukappiaraanerusut maanna inuusuttunngulersut oqalutsinnissaat ajornakusoornera ittoornermik kanngusunnermillu aallaaveqartoq, Aasianni politeeqarfiup pisortaa, Gerth Jacobsen aviisimut AG-mut oqarpoq.

Meeqqat kinguaassiuutitigut kannguttaatsuliorfigineqarsimasut, nalinginnaasumik toqqissisimanngitsutut pissusilersortarput. Taakkulu ilarpassui pinerlunniakujuttalersimapput, aserorterillutik tillinniartalersimallutillu.

Meeqqanik 17-inik amerlassuseqartunik kinguaassiuutitigut atornerluisimasutut angut 51-inik ukiulik unnerluutigineqarpoq.

Taassuma pinerluutigineqarsimasut miserratiginagillu akuerisimanngilai, maannakkorpiarlu eqqarsartaatsimigut misissortinnissani utaqqivaa.

Aasianni politiit illoqarfimmilu ilaqutariinnik sullissisut suleqatigiinnerisigut tigusarinninneq pivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq