Kinguaassiuutitigut atornerluisimaneq angajoqqaarsiaasartut Nuummi peqatigiiffiata annilaarutigaa

Angajoqqaarsiaasartut meerarsiaasartullu atugaasa pitsanngorsaavigineqarnissaat qinikkat maannangaaq iliuuseqarfigisariaqalerpaat. Ellen Sofie Chemnitz, angajoqqaarsiaasartut Nuummi peqatigiiffianni siulittaasoq taama oqarpoq. Niviarsiaqqap 15-inik ukiullip ataatarsiaminit kinguaassiuutitigut ukiuni pingasuni atornerlunneqarsimaneranut atatillugu suliap takutippaa, sullissisumik peqartoqartariaqartoq Ellen Sofie Chemnitz oqarpoq, sullissisumillu angajoqqaarsiaasunut takkuttoqartarsinnaanissaa aamma ujartorneqarpoq:
aggustip 28-at 2008 16:55

- Taamatummi pisoqarsimagaangat qamuuna attortittarpugut. Imaanngilarli angajoqqaarsiaasartut tamarmik meeqqanik atornerluisuusartut, Ellen Sofie Chemnitz oqarpoq, nangillunilu:

- Meeqqat sullinneqarnissaannut pilersaarusiortoqartariaqarpoq, meeqqallu nalunaarutigineqarsimasumik ukiumut ikinnerpaamik ataasiarlutik pulaarneqartarnissaat pisariaqarpoq, siumullu nalunaarutigineqarsimanngitsumik marloriarlutik pulaarneqartarnissaat pisariaqarsorinarluni, angajoqqaarsiaasartut siulittaasuat oqarpoq.

Meeqqat tatigisaminnik pulaarneqartartuuppata ammanerunissaat immaqa qulakkeerneqarsinnaassagaluartoq Ellen Sofie Chemnitz isumaqarpoq, atornerlunneqarsimassappata qununatik pisimasumik oqaluttuarsinnaanissaat neriuutigalugu.

Meeqqat inuusuttullu angerlarsimaffiup avataanut inissinneqarsimasut pillugit misilittakkat septembarip qaammataani ataatsimeersuartoqarnikkut Nuummi paasiniaaqatigiittoqassaaq, meeqqanik inuusuttunillu sullissisut nunat avannarlerneersut ataatsimeersuariassagamik.

Meeqqat inuusuttullu pitsaanerusumik sullinneqarnissaat siunertarineqarpoq, angajoqqaarsiaasartullu aamma pitsaanerusumik sullinneqarnissaat anguniarneqarluni.

Ataatsimeersuarnermi peqataasut sullissineq pitsaanerusoq anguniarlugu innersuussuteqassapput.

Niviarsiaraq 15-inik ukiulik kinguaassiutimigut ataatarsiaminit Paamiuni atornerlunneqarsimasoq, nammineerluni politiinut saaffiginnippoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq