Kinguaassiuutimikkut atornerlunneqarsimasut ikiorneqassapput
Naalakkersuisup Mimi Karlsenip ammaalluni oqalugiarnermini aallartinniaaluusaarnermik taasani, maanna meeqqanut inuusuttuaqqanullu kinguaassiuutitigut atornerlunneqarsimasunut katsorsaasarfissaq maanna piareertutut oqaatigaa, taamaalillunilu naalakkersuisoqatigiit ukiut marluk qaangiuttut neriorsuutigisimasartik tassalu atornerluinermut pitsaanerusumik akiuiniarnissaq maanna piviusunngortippaat.
Illumi pisortanngussaaq tarnip pissusaanik ilisimasalik, Annalise Rust, apeqqutissarpassuaqarporlumi nammineq akissutissaqartinngisaminik:
- Kikkunukua kinguaassiutitigut atornerlunneqartartut, kinguaassiuutitigut atornerluinerit qanoq ittunukua ingerlanneqartartut, kikkunuku atornerluisartut sumilu tamakku pisarpat.
Pisut eqqarsaatigalugit neriuutigineqarpoq siunissami meeqqanik inuusuttuaqqanillu atornerluisarnerit pitssanerusumik ikiorserneqartalernissaat, minnerunngitsumillu oqartussat akisussaasut illumut ataatsimut katersuutsinneqarnerisigut, suliassat ikinnerusut taammaatiinnnartalerneqarumaartut, Annalise Rust naqissusiivoq.
- Taamaattumilluuna meeqqap saaffiginniffissanut marlunnut, pingasunut sisamanulluunnit oqaluttuaqattaartinneqarneranut taarsiullugu, tassami ilisimaneqarpoq tamakku atornerluinerit paasiniarneqarnissaanut pingaarutilerujussuusarpoq suliat taamaattut naammassineqarnissaat, tassami saaffigisassat arlaqarangaata ilaatigut suleqatigiinniarnerup ajornakusoorneranik angajoqqaallu tunniutiinarnerannik pissuteqartumik suliassat ilai qulaajarneqanngitsoortarnerat pissutigalugu, katsorsaasarfik ilisimasaqarfillu pilersinneqartoq amerlanerpaat ikiorserneqarnissaat anguniarlugu.
Misissuisarsimanernit nammineq ilisimasaminit paasivaa, nunami maani kinguaasiuutitigut innuttaasut atornelunneqarsimasut 35 procenterigaat, kisiannili 6 procentiinnaat tarnikkut katsorsarneqarnissaminnik neqeroorfigitittartut.
Maannakkumut 2013 tikillugu aningaasaliisoqarallarpoq, tamatuma kingora suliniut nalilersoqqinneqassaaq. Pisoratå Annalisa Rustip saniatigut ullup affaanut peqqissaasumik atorfinitsitsitsissoqassaaq kiisalu katsorsaasuumik ulluinnarnilu allaffissornermik pisortamik ulloq naallugu sulisartussanik atorfinitsitsisoqassalluni.
