Politiit 2018 pillugu: Kinguaassiutitigut pinerliinerit ukiuni kingullerni tallimani aatsaat taama amerlatigisut
Kinguaassiutitigut pinerliinerit ukiuni kingullerni tallimani amerleriarput.
Pinerluttulerinermilli inatsimmik unioqqutitsinerit pillugit nalunaarutiginninnerit aatsaat taama ikitsigipput. Pinerluttulerinermi inatsimmik unioqqutitsinerit pillugit nalunaarutiginninnerit 2018-imi nuna tamakkerlugu 3449-iupput, 1986-imullu naleqqiutissagaanni amerlassutsimikkut affaannanngorsimasutut oqaatigineqarsinnaallutik, pinerluttulerinermi inatsimmik unioqqutitsinerit taamani 6721-ummata.
Kalaallit Nunaanni Politiit ukiumoortumik kisitsisitigut paasissutissaataanni saqqummersinneqaqqammersuni tamanna atuarneqarsinnaavoq.
Tillinniarnerit amerlassutsimikkut affaannanngortut
Kinguaassiutitigut pinerliinerit amerleriarnerisa, pinerluttulerinermilu inatsimmik unioqqutitsinerit pillugit nalunaarutiginninnerit aatsaat taama ikitsiginerisa saniatigut, tillinniarnerit 2016-imut naleqqiullugit affaannanngorsimanerat politiit erseqqissaatigaat. Tillinniarnerit 662-t 2016-imi nalunaarutigineqarput - siorna nalunaarutigineqartut 301-iullutik.
Politiillu naapertorlugit inuusuttut pinerluuteqartartut aamma ikiliartorput.
Kinguaassiutitigulli pinerliinerit ajornerpaamik inissisimapput. Pinngitsaaliinerit, kannguttaatsuliornerit meeqqanillu kinguaassiutitigut kannguttaatsuliornerit amerliartorput: Politiinut nalunaarutiginninnerit siorna 436-upput, ukiunilu kingullerni tallimani aatsaat taama amerlatigalutik.
Meeqqanik kinguaassiutitigut kannguttaatsuliornerit taama amerlatiginerat, inuiaqatigiinni ajornartorsiutit anginersaattut Kalaallit Nunaanni Politiinit isigineqarnera qularutissaanngilaq, politimesteri Bjørn Tegner Bay taama oqarpoq.
- Tamatumunngalu peqatigitillugu nalunaarutiginnittarnerit amerleriaateqarnerat aamma pitsaasutut isigineqartariaqarpoq. Politiinit unnerluussisussaatitaassuniillu maannakkorpiaq malugisinnaavarput kinguaassiutitigut kannguttaatsuliornerit paqumigineqartarnerat arriitsumik qaangeriartorneqartoq. Tamannalu nalunaarutiginnittarnerit amerleriaateqarnerannut pissutaasimassappat, amerleriaateqarnerat pitsaasumik ineriartortoqarneratut isigineqarsinnaavoq. Anguniagarli suli ungasippoq, politimesteri oqarpoq.
