Assi: KNR/Arkiv

Politikerit: Kinguaassiutitigut kanngutsaatsuliorfigineqartut pilertortumik ikiorneqartassapput

Kinguaassiutitigut kannguttaatsuliorfigineqartut tarnip pissusaanik ilisimasalimmit ikiorneqarnissaminnut qaammaterpassuarni ukiunilu arlalinni utaqqisassanngillat, kannguttaatsuliorfigineqarnermik kingorna pilertortumik ikiorneqartassapput.

Meeqqat atugaat pillugit KNR-ip tv-kkut marlunngormat oqallitsitsinerani partiit tamarmik tamanna naqissuserpaat.

Oqallittoqarnerani 29-nik ukiullip Connie Arenasip qulingiluanik ukioqarluni pinngitsaalineqarsimanini oqaluttuaraa. Pinngitsaaliisoq parnaarussassanngortinneqarluni pineqaatissinneqarpoq Connie Arenasili inuusuttuaraalluni kommunimit ikiorneqarnissaminik noqqaagama aatsaat ukiut 18-it qaangiummata tarnip pissusaanik ilisimasalimmit ikiorneqarnissamik neqeroorfigineqarpoq.

AAMMA ATUARUK Paasiniaaneq meeqqanut inuusuttuaqqanullu atugarliortunut iluaqutaassaaq

Tamannalu akuersaarneqarsinnaanngilluinnartoq, partiinit oqaatigineqarpoq.

- Siullertut isumagisassarput tassaavoq pilertortumik iliuuseqarnissamut upalungaarsimasuutitanik pilersitsinissaq. Upalungaarsimasuutitat kinguaassiutitigut kannguttaatsuliorfigineqarsimasunut ikiuisussanik ilinniarsimasunik sulisoqassapput, Inuit Ataqatigiinneersoq Olga P. Berthelsen taama oqarpoq.

Toqqaannartumillu aperineqarami neriorsuutigaa Inuit Ataqatigiit siuttunngussappata upalungaarsimasuutitanik qinigaaffiup tulliup ingerlanerani pilersitsisoqassasoq.

24 tiimit iluanni ikiuinissaq

18-it inorlugit ukiullip kinguaassiutitigut kannguttaatsuliorfigineqarsimaneranik kommunimut nalunaaruteqartoqarneranit nalunaaquttap akunneri 24-t qaangiutinnginnerini isumaginninnikkut misissuisoqassanersoq aalajangiiffigissallugu kommunit ullumikkut pisussaaffigaat. Tamanna Meeqqat ikiorserneqartarnerat pillugu inatsimmi 2017-imeersumi aalajangersarneqarpoq.

Tarnilli pissusianik ilisimasalimmit ikiorserneqarsinnaanissaq aamma qulakkeerneqartariaqarpoq, kannguttaatsuliortoqarnerit nalunaaquttap akunnerini 24-it qaangiutinnginnerini piareersimasoqaqqullugu - imaluunniit pisup oqartussanut nalunaarutigineqarneranit nalunaaquttap akunneri 24-it qaangiutinnginnerini, Atassummeersoq Hanseeraq Jonathansen taama isumaqarpoq.

Erngertumik ikiunissaq

Nakuuserfigineqarsimaguit imaluunniit kinguaassiutitigut kannguttaatsuliorfigineqarsimaguit ikiorneqarnissallu pisariaqartillugu, taava uku attavigisinnaavatit:

- Meeqqat Inuusuttullu Oqarasuaataat, normumut 134

Attavik normumut 146-mut, innuttaasut ajornartorsiuteqartut attaveqarfigisinnaasaat.
 

- Uanga isumaga malillugu meeqqat nalunaaquttap akunneri 24-t iluanni ikiorneqarnissartik pisinnaatitaaffigaat. Tamannali sulinermi najoqqutassaannaavoq inatsisiliornikkut aalajangersagaanngitsoq. Inatsimmut nalunaarutinullu ilanngunneqartariaqarpoq.

Demokraatit Suleqatigiissitsisullu aamma taamatut isumaqarput.

Meeqqat Illersuisuata Aviâja Egede Lyngep oqallittoqarnerani oqaatigaa meerarpassuit inuusuttorpassuillu imminnut toqoriarnermi kingorna aatsaat ikiorserneqartartut.

Suleqatigiissitsisuneersup Tillie Martinussenip nassuerutigaa kommunit tarnip pissusaanik ilisimasalinnik sullissisunillu amigaateqarneq pissutigalugu ikiorsiinissamik neqerooruteqarnissartik ajornakusoortittaraat. Taamaattorli:

- Suliassaq kommunini kivissinnaanngikkutsigu - paasilluarsinnaasattut - sullissisummi suliassarpassuaqareermata - taava qitiusumi sullissivinnik tamatumani tapersersuisinnaasunik pilersitsisariaqarpugut.

AAMMA ATUARUK Atornerlunneqarsimasut tappiffiginerusariaqarpagut

Partiit kannguttaatsuliortoqartarnerata akiorneqarnissaa katersuuffigaat

Isumaginninnermut naalakkersuisup Sara Olsvigip Jess Svanemut (S) januaarip qaammataani akissuteqarluni nalunaarutigaa kannguttaatsuliortoqartarneranik ataatsimoortumik suliniuteqarnissaq piareersarneqartoq.

Ataatsimoortumik suliniuteqarnermi inuit kinguaassiutitigut kannguttaatsuliorfigineqarsimasut qanoq ukioqarnerat apeqqutaatinnagu ikiorserneqarnissaat qulakkeerneqassaaq, tamatumunngalu peqatigitillugu kannguttaatsuliorfigineqartut ilaqutaasa attaveqarfigisaasalu ikiorserneqarnissaat immikkut aamma sammineqassalluni.

Suliniutaasussarlu partiit tamarluinnarmik marlunngormat oqallittoqarnerani taperserpaat.

AAMMA ATUARUK Det var nemmere at lade være med at snakke om det

Siumumeersup Paninnguaq Tarrak-Petrussenip oqaatigaa meeqqat inuusuttullu amerlavallaartut uteqattaartinneqartartut, ikiuinissaq atuarfinnit, paaqqinnittarfinnit, kommuninit Namminersorlutillu Oqartussanit naammaginartumik ataqatigiissaarneqarneq-ajormat.

Partii Naleqqameersup Ole Thorleifsenip Nunatta Qitornaaneersullu Mikael Ludvigsenip taamaattoqarnera aamma nassuerutigaat, taakkulu isumaqarput oqartussat atuarfiit, kommunit paaqqinnittarfiillu akimorlugit suleqatigiinnissamut pisussaaffeqarnerat inatsisiliuunneqartariaqartoq.

IQ2018 Debat: Børns vilkår KNR 17.04.2018

 

Isummersuutit