Kinguaassiutitigut innarliiniartartut katsorsarneqartalernissaat ujartorpaa
- Oqartoqarsinnaavoq tunngaviatigut pingaaruteqartoq kinguaassiutitigut innarliiniartartoq innarlerneqartutulli ikiorneqartariaqartoq. Nunani allani misilittagarineqarpoq kinguaassiutitigut innarliiniartartut katsorsartarlugit, misissuinerillu takutippaat, katsorsaanerit kingunerisaraat, kinguaassiutitigut innarliinernik pinerluuteqartartut assigisaanik pinerluuteqartannginnerinik, Connie Gregersen oqarpoq.
Kinguaassiutitigut innarliiniartartut sunniuteqarluartumik katsorsarneqarsinnaalernissaat ajornakusoortoq, Connie Gregersenip tikkuarpaa.
- Tassami katsorsaanerit annertuut ingerlanneqartariaqarput, taamatullu katsorsaanerit nalinginnaasumik sivisuumik ingerlanneqartarput. Periarfissallu taamaattut Kalaallit Nunaanni amigaatigineqarput. Aamma misilittakkat amigaatigineqarput, soorlu kinguaassiutitigut innarliisartoq eqqaaginnarutsigu, taava nalinginnaasumik takorloortarparput pinerluuteqarsimasutut pineqaatissinneqassasoq, innarlerneqarsimasorlu takorloortarparput ikiorneqarluni katsorsarneqartussatut.
Aamma pingaaruteqarpoq kinguaassiutitigut innarleerusuttartoq katsorsassallugu, taamatulli oqariarlunga taava aamma akunnattoorutigisara oqaaatigisariaqarpara.
- Tassa immikkut ittunik piginnaasalinnik katsorsaasinnaasunik kinguaassiutitigut innarleerusuttartut katsorsaneqartariaqarmata. Naammanngilaq oqaloqatigiinnarlugit, tassami katsorsarneqartup eqqarsartaasai iliuusaalu sammineqassagamik, katsorsarneqartorlu imminut suliariniartussaassaaq, taamaattumik pingaaruteqarpoq katsorsaariaatsit tulluartut pigissallugit, Connie Gregersen oqarpoq.
Meeqqanik inuusuttuaqqanillu atornerluisartut katsorsarneqarsinnaanissaat inatsisitigut aqqutissiuunniarlugu, naalakkersuisut iliuuseqarniarlutik qanoq pilersaaruteqarnersut, Inuit Ataqatigiit sinnerlugit inatsisartunut ilaasortaq Olga Berthelsen Naalakkersuisunut paragraf 36 immikkoortoq 1 naapertorlugu apeqquteqarpoq.
