Kinguaassiutitigut atornerluisimasut eqqartuussivimmut qaqugukkulluunniit tunniunneqarsinnaalerlik
- Inuit Nunatsinni amerlapput meeraallutik kinguaassiuutitigut atornerlugaasimasut inersimasunngoraangamik nukittuninngorlutik oqaaseqarusussinnaanngortartut, taakkuali saaffissaqarneq ajorput oqarlutik: "Pinerluttulerinermi inatsimmi aalajangersakkami una malillugu una unnerluutigerusuppara". Taamaattoqanngilagut, qanganitsereertarmata, Astrid Fleischer Rex, Demokraatineersoq, oqarpoq.
Siunnersuut Inatsisartut 2008-mi upernaakkut ataatsimiinneranni siullermeerutaasumik oqallisigineqarmat, partiinit tamanit tapersersorneqarpoq, Inatsisartut 2008-mi ukiakkut ataatsimiinneranni aappassaaneerneqartussanngortinneqarluni. Aappassaaneerneqarnissaali Inatsisartut 2009-mi upernaakkut ataatsimiinnissaannut kinguartinneqarpoq, qinersisoqartussanngormalli nakkaannarluni.
Siunnersuut Siumumiit ilassilluarneqarpoq. Siumup siulittaasua AleqaHammond ima oqarpoq:
- Isumaqarpugut pingaaruteqartorujussuusoq ajornartorsiutip kinguaassiuutitigut atornerluisarnerup akiorniarneqarneranut ilanngullugu illersuutaasinnaasoq, inuit innarlerneqarsimasut kusananngitsuliorfigineqarsimasullu qanorluunniit ukioqalersimagaluarunik illersorneqarsinnaasumik isumagineqartalernissaat isumaqaratta pingaaruteqartoq, Siumup siulittaasua Aleqa Hammond oqarpoq.
Atornerlugaasimasutummi misigisup atornerlugaasimasarnini uppernarsisinnaassanngippagu? Artorsarnerulissanngila? Astrid Fleischer Rexip tamanna ima akissutissaqartipppaa:
- Eqqartuussisunut tunniussisinnaalissagaluarput oqarlutik meeraagallarama uuma atornerlunnikuuaanga. Taavalu uppernarsineqarsinnaappat, taava eqqartuussineq soorunami aallartinneqarsinnaassaaq, kisiannili soorunalimi ilumoorputit oqaravit ukiorpassuit qaangiutereersimammata uppernarsisinnaanissaa nalunartaqisoq, pissutsilli ullumikkut imaapput: Suliluunniit saaffissaqanngillat, inerillutik, imaluunniit utoqqanngorlutik imatullu nukittortigisimallutik annilaangajunnaaramillu oqaatigisinnaanngorlugu, Demokraatit sinnerlugit Inatsisartunut ilaasortaq Astrid Fleischer Rex oqarpoq.
Knud Kristiansenip Atassumeersup oqaatigaa, siunnersuut tunngaviusumik tapersersoritsik. Inuit Ataqatigiinniit oqaaseqartitsiniaraluaratta iluatsinngilarput.