Kinguaassiutitigut atornerluisartut katsorsarneqarnerusalissapput
Aamma piffissaligaanngitsumik pineqaatissiisarneq tamatumunngalu atatillugu nunamut allamut aallarullugit pineqaatissiisarneq, inuit tunngaviusumik piginnaatitaaffiinut naapertuutinngitsoq, naalakkersuisut isumaqarput.
Taamaammat pinerluttulerinermut inatsimmi, januaarip aallaqqaataani 2012-imi atuutilersumi, malittarisassat aallaqqaataaniit malinneqarnissaannik nunatta naalakkersuisuisa danskit naalakkersuisui kiminniarniarpaat.
Danskit inatsisinik atortitsinermut ministeriat, Lars Barfod, Nunatsinnut aasaru tikeraassaaq.
- Eqqartuussiveqarnermut tunngasut danskit naalagaaffiannit suli akisussaaffigineqarput. Uagullu periarfissarput tassaavoq danskit naalakkersuisuinik aamma folketingimi sunniiniarnissaq, naalakkersuisut siulittaasuat Kuupik Kleist oqarpoq.
Taassuma anersaatava siunertaatalu piviusunngortinneqarnissaa malersortussaallugu, Kuupik Kleist oqarpoq.
Pitsanngoriaaatissaqareerporli. Pinerluttulerinermut inatsit atuutilereerpoq, aamma pineqaatissinneqarsimasunut matoqqasumik inissiisarfimmik nunatsinni sanasoqassaaq.
Taava kusanartumik tusaqqusaarnerunngila piffissaligaanngitsumik pineqaatissiisarnerup unitsinneqarnissaa massakkut oqaatigissallugu?
- Naluara kusanartutut oqaatigineqarsinnaanersoq, pissutsit alianartuupput inuppassuarnullu nanertuutaallutik, taamaattumik oqallisigineqarnera ilumoorsaarnartupilussuuvoq, aamma nunatsinni parnaarussiveqalertussaavugut ukialuit qaangiuppata, tassungalu tunngasoq piareersarnerput aallartereerparput, Kuupik Kleist oqarpoq.
Kinguaassiutitigut atornerluisartut piffissamik killiligaanngitsumik pineqaatissinnagit katsorsarneqartariaqarnerat danskit naalakkersuisuinut Folketingimullu ilaasortanut paasitissallugu suliassaasoq angisooq, Kuupik Kleist isumaqarpoq.
