VIDEO Kinguaassiutitigut atornerluisarneq tamanit akiorniarneqalersoq
- Tamanna illersorneqarsinnaanngilluinnarpoq. Suliap erngertumik aallartisarneqarnissaanut tamakkuninnga sullissisussanik peqartariaqarpugut.
- Taamaammat maannakkut tamatuma piareersarnissaanut aallartittariaqarluta oqaatigaarput. Isumaginninnikkut ajornartorsiutit annertuupilussuupput. Arlallit oqalupput sipaarniassasugut ikinnerusunillu sulisoqartariaqartugut. Suliassaqarfinnili taakkunani immikkut iliuuseqartariaqarpugut, annertunerusumillu iliuuseqartoqassappat sulisorineqartut amerlanerusariaqarput, kommunit kattuffianni Kanukokami siulittaasoq, Palle Jeremiassen, taama oqarpoq.
Aamma atuaruk Meeqqat naaggaarsinnaaneq ilinniassavaat
Arnajaraq Poulsenip, Kommuneqarfik Sermersuumi immikkoortortami pisortaasup, inunnik isumaginninnermi siunnersortit erloqinartunik atugassaqartinneqaraluarlutik annertuumik suliaqarnerat nersualaarpaa.
- Ajornartorsiut ima annertutigaaq, allaat kommunit kisimiillutik suliassamik kivitsisinnaanatik. Allatigut ikiorsiissutaasinnaasunik pisariaqartitsisoqarpoq, Arnajaraq Poulsen oqarpoq.
Martha pilersaaruteqarpoq
Ilaqutariinnermut, naligiissitaanermut, isumaginninnermut peqqissutsimullu naalakkersuisup Martha Lund Olsenip (S) atornerlunneqarsimasut akeqanngitsumik katsorsarneqartalernissaannik Naalakkersuisut pilersaarutaat ajornartorsiutaasunik ikilisitsisinnaanasoraa.
- Arlalitsigut suliniuteqassaagut. Kommunit akisussaaffeqarput aningaasanillu amerlanerusunik immikkoortitseqqammerpugut - 8 millionit, taakkulu kommunit sullissinerup annertusarnissaanut atussavaat.
Aamma atuaruk Meeqqat tatigisaminnit atornerlunneqartarput
- Iliuuseqarnissatsinnut piareersimavugut, aamma taama amerlatigisut ikilisarneqarnissaannut immikkut iliuuseqarnissarput pingaartipparput. Akisussaaffeqarpugut, meeqqallu kinguaassiutimikkut atornerlugaananik nuannersumik inuuneqarsinnaanissaat upperaarput, Martha Lund Olsen taama oqarpoq.
Angajoqqaat akisussaaffeqarput
Palle Jeremiassenip naggataatigut erseqqissaatigaa kommunit nukippassuarniik atuisarmata suli amerlanerusunik pisariaqartitsisut.
- Ajornartorsiulli tamaat oqartussaasunut tunniutiinnassanngilarput. Uangaqarpormi aamma, ataataasutut, inuiaqatigiillumi tamarmik, tamattalu akisussaaffimmik tiguseqataassaagut.
- Qitornartaarsimagutta, uagut tamanna nammineq akisussaaffigaarput. Uagut tassaavugut toqqissisimasumik peroriartornissaanik isumaginnittussat. Tamatta akisussaaffeqarpugut, akisussaaffilli annerpaaq angajoqqaaniippoq.
