Maligassiuisoq: Kinguaassiutitigut atornerluisarneq pillugu saaffiginnittoqarluartarpoq

Killiliisami maligassiuisut arfinillit suliassaat pillugit siorna novembarimi siullerpaamik isumasioqatigiisitsisoqarpoq. Maligassiuisullu qanoq pitsaanerpaamik suleqataanisssaat tunngavissinneqarluni. 
Kinguaassiutitigullu atuinerluisarnerit pinngitsoortinniarlugit suliniutinik maligassiusisut suliassaqalerput.

Maligassiuisut ilaat Heidi Møller Isaksen misilittagaqalereerpoq.
- Sorujussuaq uagutsinnut iluaqutaasimaqaaq, avitseqatigiilluta misigissutsit tungaatigut misilittakkat tungaatigut taamanili aamma uagutsinnut iluartorujussuuvoq taamatut naapeqatigiissinnaaneq, maligassiuisut ilaat kinguaassiutitigut atornerluisimanermut qanigisaasoq Heidi Møller Isaksen oqarpoq.

Maligassiuisut iluaqutaasut
- Nunatsinniit soqutigineqartupilussuuvugut, attavigineqallattaarpugut. Assersuutigalugu januaarimi uanga Qaanaamut qaaqqusaavunga, maligassiuisutut oqalugiassaanga Qaanaarmiunut inersimasunut inuusuttunullu. Tassa nalunngingaaratta qanoq taamatut nalaataqarluni pisariaqarnersoq, tapersersorneqarnissaq qanoq pingaaruteqarnersoq, Heidi Møller Isaksen oqarpoq.

AAMMA ATUARUK Kielsenip maligassiuisut qujassuteqarfigigai

Kinguaassiutitigut atornerluisarneq akiorniarlugu naalakkersuisut periusissiaat 2018-imit 2022-p tungaanoortoq siorna saqqiummiunneqarpoq, tamatumalu malitsigisaanik maligassiuisut pilersinneqarlutik.

- Sorsukkusuppunga suli siumut assut, nukissanik ulikkaarpunga siammartiterusullunga, neriuummik nunaqqatinnguatsinnut taamatut nalaatalinnut, maligassiuisoq oqarpoq.

Maligassiuisut peqataanerisa sunniuteqarnerat Isumaginninnermut aqutsisoqarfiup takusinnaalereerpaa. Heidi 2007-imiilli angajoqqaatut sapiissuseqarluni saqqummertareerpoq ullullu tamangajaasa allaffigineqartarluni aammali unammillernartoqarpoq.

- Uanga kisima taamatut allaffigineqarneq ajorpunga, maligassiuisut allat, maligassiuisoqatikka taamatut ullut tamaasa allaffigitittarput. Pinerit tamangajaasa allaffigitittarpugut: ilissi pisuullusi saqqummerpugut imaluunniit allappugut. Neriuummik tunineqarpugut, taamatut saqqummertoqarnikuummat taava ilissi sapinngikkussi aamma uagut sapinngilagut, uagut ikioqataassaagut, maligassiuisuni peqataasoq, Heidi Møller Isaksen oqarpoq.

Heidi Møller Isaksenip erseqqissaatigaa, maligassiuisut psykologiunatik saaffiginnittunulli tusarnaartuusarlutik.