Kinguaassiutitigut atornerluisarneq akiorniarneqalerpoq

- Perorsaanermi tamatta akisussaassuseqarpugut, kinguaassiutitigullu atornerluisarneq akiorniartariaqarparput. Tarnip pissusiinik ilisimasalik Else Poulsen oqarpoq, nangipporlu:

- Uagut inersimasuusugut akisussaavugut assigiinngitsutigut peroriartortunut iliuuseqarnissatsinnut. Kinguaassiutitigut atornerluisarneq unitsinneqartariaqarpoq. Nalinginnaavallaaqaaq, Else Poulsen oqarpoq. Taanna kinguaassiutitigut atornerluisarneq pillugu pinaveersaartinneqarnerannik periaasissaq pillugu suleqatigiissitat ataatsimiinneranni ippassaq naammassineqartumi peqataavoq. Annersaasarnerup akiorniarneqarnissaa pillugu aamma ataatsimiittoqarpoq, Else Poulsenillu neriuutigaa qinikkat maanna iliuuseqarnialissasut:

- Eqqartuinissaq ineriartortitsinissarlu soorunami pingaaruteqarpoq, aamma neriuutigaarput politikerit eqeersimaarlutik nuna tamakkerlugu saaffiginniffissamik pilersitsissasut. Uanga inuttut aamma taama isumaqarpunga, pisariaqalermammi taamaattumik pilersitsisoqarnissaa, tarnip pissusiinik ilisimasalik Else Poulsen oqarpoq. Taanna Pædagogisk Psykologisk Rådgivningimi Qaqortumiittumi atorfeqarpoq.

Else Poulsenip Inga Egedemit apersorneqarnera KNR-ikkut sapaatiuppat unnukkut nalunaaqutaq arfinerniit aallartittumik aallakaatinneqassaaq.