Kinguaassiutimikkut atornerlunneqartut assiutigineqartut
Meeqqat kinguaassiutimikkut atornerlunneqartut assinginik nunatsinni atuisut ullormut 28-usarput.
Naalagaaffiup politiivisa maajimi naatsorsuutaanni tamanna atuarneqarsinnaavoq.
Meeqqat kinguaassiutimikkut atornerlunneqartut assinginik immikkoortiterut januaarip naalernerani atorneqalerpoq meeqqallu kinguaassiutimikkut atornerlunneqartut assinginik internet atorlugu isiginnaarniaraluartut tamatuma kingorna unitsinneqartalerput.
Isiginnaarniaraluartut 28-usut affai mianersoqqussummik nittaaffigineqaraangamik nittartakkamut allamut saapallattarsimapput. Danmarkimi agguaqatigiisillugu aamma taamaattarsimasut, naalagaaffiup politiivisa nalunaarutigaat.
Mianersoqqussummik nittaaffigineqaraangamik nittartakkamut allamut saapallattartut politiinit misissuiffigineqarneq ajorput. Isiginnaaqqusaanngitsunik isiginnaartoqannginnissaa taamaallaat anguniagaasarpoq. Nittartakkat aalajangersimasut isiginnaaqqusaangitsut taamaalillutik immikkoortiterummut ilanngunneqartarput, massakkullu nittartakkat isiginnaaqqusaanngitsut tusintillit arlaqartut Danmarkimi naalagaaffiup politiivisa nalunaarutigaat.
