Kinguaassiutikkut atornerlugaasimasut pillugit peqatigiiffittaarput

Kinguaassiutikkut innarliisarneq akiorniarlugu peqatigiiffimmik pilersitsisoqarpoq. Ukiuni kingullerni arlaqalersuni kinguaassiutikkut atornerluisarnerup annertuneruleraluttuinnartumik tusagassiutitigut samminittarnerit ingerlanneqartarlermata, eqqugaasunillu sullissisarnerit amingaateqarmata, aammalu sullissisartut pikkorissartinneqartuartarnissaat pisariaqarmat, suliniaqatigiit isumaqarsimapput, peqatigiiffimmik suliniartussamik pilersitsisoqartariaqartoq. Peqatigiiffimmik pilersitseqataasoq Arnaq Grønvold ima oqarpoq.

- Misissuinerit annertoorujussuit atunngikkaluarlugit kajumissutsitsinnik peqatigiiffimmik pilersitsivugut, nalunnginnatsigut atorfissaqartinneqarluartoq. Anguniagassanut siullertut suliassarivarput, kinaassuseq isertorlugu oqarasuaatikkut internetikkullu siunnersuisarnerup ingerlanneqartalernissaa, tassungalu atatillugu aningaasanik pissarsiornissaq ulluni qaninnerni ingerlanneqassaaq. Misilittakkat annertusarnissaat anguniarlugu sukkasuumik suliniuteqartariaqarpugut, Arnaq Grønvold oqarpoq nangillunilu: - Katsorsaanerit qanoruna ittut nunatsinni pisariaqartinneqartut, taavalu aamma kajumissutsiminnik suliaqartut atortussaanik tunioraanissaq siunnersunissaq paasisitsiniaasarnissarlu pisariaqartinneqangaatsiarpoq.

Paasisitsiniutinik suliaqarneq ikorfartoqatigiinnillu pilersitsiortornissaq malittarinninnerlu suliassanut aamma ilaassasoq peqatigiiffimmik pilersitseqataasoq Arnaq Grønvold oqarpoq.