- Upperigakku meeqqat kissaataallutik inunngortut tassaasut siunissami nukittuumik inissisimalerumaartussat, Laura Táunâjik allappoq.

Siumumeersut: Kinguaassiorusuttut inatsisitigut aqqutissiuunneqarlik

Naartorusuttut Danmarkimut misissortillutillu nakorsartikkiartortarnisaannik neqeroorutip taamaatinneqarnera Siumumeersunit marlunnit Demokraatinillu akerlilerneqarpoq.

Naalakkersuisut naartorusuttunut Danmarkimut nakorsartinnissamik neqeroorutaasimasoq atuukkunnaarsitartik atuutilerseqqittariaqarpaat. Siumumeersut marluk Demoktraatillu taama isumaqarput. 

- Isumaqarpunga periarfissanik mattussineq atornagu malittarisat nutarternerat ingerlassinnaagaat, Siumumeersoq Karl Kristian Kruse oqarpoq.

AAMMA ATUARUK Naartorusuttut Danmarkimut misissortillutillu nakorsartikkiartortarnerat unitsikkallarneqartoq

AAMMA ATUARUK - Kikkut tamarmik assigiimmik sullinneqartussaapput

Peqqinnissaqarfimmi malittarisassat atuuttut siunertaanut naapertuutinngimmata naartorusuttut Rigshospitalimi mannimmik ikkussiffigitittarnerat Naalakkersuisunit taamaatinneqarpoq.

Peqqinnissaqarfiup sullissinermini kikkulluunniit assigiimmik sullittussaagai, peqqissutsimut naalakkersuisup qanittukkut erseqqissarpaa. 

Kalaallit qitornartaarusuttut Rigshospitalimi ukiuni kingullerni tallimani passunneqartut:

2014: 8

2015: 7

2016: 7

2017: 5

2018: 6

Malittarisassat naapertorlugit, ikkussiffigitinnermik aningaasartuutip saniatigut, angalanissamut ineqarnissamullu akiliutsinnissaq periarfissaasussaavoq. Tamannali tamanut periarfissaaneq ajorpoq.

Tassa naligiimmik sullissisoqannginnera pissutigalugu Danmarkimut ikkussiffigitikkiartortarneq taamaatinneqarpoq. 

Inatsisartunut ilaasortaq Karl Kristian Kruse taama aalajangiinermut akerliliivoq.

- Naalakkersuisut tamanut assigiimmik atuutsitsinissamik suliaqarnerat, soorunami paasisinnaavarput, kisianni taanna utaqqinagu massakkut periusaasut atuutsinneqaqqilernissaannik piumasaqarpugut. Taavalu kingorna tamanut assigiimmik atuutsitsinissamik suliaqarnerat ilanngukkunikku inuiaqatigiinnut peqqinnarnerusoraarput.

Karl Kristian Kruse parteeqatiminit Laura Táunâjimmit ilalerneqarpoq. 

- Ikiorneqarnerunissaat aporfilersuinnarnagit inatsisitigut aqqutissiuunneqartariaqarput. Upperigakku meeqqat kissaataallutik inunngortut tassaasut siunissami nukittuumik inissisimalerumaartussat, ilaqutariinnermut peqqissutsimullu ataatsimiititaliami siulittaasoq Laura Táunâjik tusagassiuutinut allappoq.

Partii ikorfartortaasoq isumaqataavoq

Naalakkersuisunut ikorfartortaasut Demokraatit aamma isumaqarput meeqqiorusuttut taperserneqartariaqartut:

- Nalunngilluinnarpara meerartaarnissamik kissaateqarlutik meerartaartut, angajoqqaatut suna tamaat atorlugu, meeraq toqqissisimasumik perornissaa isumagissagaat, Demokraatit siulittaasuat Nivi Olsen oqarpoq.

Naartorusuttunut Danmarkimut atortorissaarutit atorlugit naartulersinnaannissaannik ikiuineq, Naalakkersuisut inatsimmik nalilersuineranni, taamani unitsikkallarneqaqqaarpoq. Demokraatit taamani tapersiipput taamaativinneqarnissaanilli akerliupput.

Nakorsaatit atorlugit mannissanik kaanngartitsinissaq nunatsinni illoqarfinni tamani periarfissaavoq, angutillu anisuuannik arnamut ikkussinissaq Ilulissani Nuummilu aamma periarfissaalluni.

Danmarkimili nunatsinnut nalerqqiullugu ikiorserneqarnissamik periarfissagissaarneruvoq.

Naartorusuttut naligiimmik ikiorserneqartalissappata arnanut 40-nut angalaneq ineqarnerlu ukiumut 5 millionit koruunit 6 millionit koruunillu akornanni akeqassasoq, naalakkersuisup oqaatigereerpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat