Kingoraartissatut ilinniartuusoq pisortaaninngunngilaq

Flemming Knudsen taamaatippat, Paaviaaraq Heilmannip pisortaaninngornissaa eqqarsaataagaluarpoq. Taaamaattoqanngilarli. Mikael Thinghuus naluneqanngitsutut pisortaaninngussaaq - kisianni taava Paaviaaraq Heilmann piukkunneqarsimanngila?

- Royal Greenlandimi ukiuni sisamani pisortatut sulinissara ukiut sisamat matuma siorna isumaqatigiissuteqarfigaara, taannalu tassa naalerpoq, Paaviaaraq Heilmann oqarpoq.

Paaviaaraq Heilmannip nunatsinni suliffeqarfiit annersaanni pisortaaninngornissaa eqqarsaataasimasoq, Royal Greenlandip siulersuisuini siulittaasup Niels de Coninck-Smithip nassuerutigaa. Taamaammat pisortaanninngornissamut qinnuteqarsimanerluni?

- Naamik taamaaliunngilaq. Kisianni paasivara, Flemming Knudsenip Taamani pisortanngorneranut atatillugu oqaatigineqarsimasoq, Paaviaaraq Heilmann Flemming Knudsenimut kingoraartaasinnaasoq, Niels de Coninck-Smith oqarpoq.

Taamannallu nalunaartoqarsimanera peqqutigalugu Paaviaaraq Heilmannip maanna suniarnera nalunaarutigissallugu pisariaqartoq, Niels de Coninck-Smithip oqaatigaa.

- Kisianni qinnuteqartutut nalilersorneqanngilaq, Niels de Coninck-Smith oqarpoq, erseqqissarlugulu, Paaviaaraq Heilmanns pakatsisimanngitsoq.